Ug kamo mobiya ba usab kamo kanako?

Maayong Balita

Gumikan sa pagtulon-an ni Jesus daghan sa iyang mga sumusunod ang naglisud intawon pagtugkad. Ang mga pagtulon-an sama pananglit sa:

 “Ang mokaon sa akong unod ug moinom sa akong dugo, makabaton sa kinabuhing walay katapusan!” Niadtong panahona bag-o ra gyud kaayo kining maong pagtulon-an.

Apan alang kanatong mga Kristiyano Katoliko por lo menos nakadawat man kita niini. Atong nakita ang kataphawan nila sanglit ang ila lamang mauyonan ang mahimo nilang dawaton apan magdumili sila sa paghangop sa pagtulon-an nga makapatukbil sa ilang mga kabalaka.

Kasinatian

Diha sa atong paghigugma atong gidawat ang tawo apan sa laing bahin atong gidawat usab ang iyang baruganan.

Bisan pa man kun dunay panagbingkil sa mga baruganan apan gumikan sa gugma ato kining gitahud. Diha sa atong pagsunod kang Kristo atong gisunod dili lang si Kristo kondili lakip na ang iyang mga pagtulon-an.

Anaa kaniya ang pulong alang sa kinabuhing walay katapusan. Matang sa kinabuhi nga dili mahimong mahatag sa kalibutan. Sa makadaghan kita nagbagulbol apan nakaamgo kita sa kaulahian nga dunay daghang mga butang nga angayan natong pasalamatan.

Unta saulogon nato bisan sa mga ginagmay nga kaayohan ug panalangin nga atong nadawat. Kun atong nadawat si Kristo Jesus nan, atong saulogon ang Sagrada Eyukaristiya nga maoy kabaskog sa atong lawas ug kalag.

Lihok

Batoni ang kaisog sa pagpadayag sa pagtuo. Ayaw ikaulaw ang pagtulon-an sa atong tinuohan. Hinumdomi nga wala kitay laing kadangpan kondili si Kristo lamang.

Pangamuyo

Tanan: Salamat Ginoo kay anaa ikaw sa among taliwala. Sa panahon nga kami wala makapasalamat kanimo, pasayloa kami. Himoa ang among kinabuhi ingon nga usa ka pasalamat.   Ikaw nga buhi ug Hari hangtud sa kahangturan. Amen.