Pagpamalandong sa Malangkubong kaayohan
Sa dili pa mohimo og bisan unsang pakig-asdang angayan lamang nga mangandam gyud ang mga hingtungdan. Sa natad sa espirituhanong pakig-asdang ang pagpangandam usab kinahanglanon kaayo.
Naglangkob kini ning mosunod:
Paghinulsol
Dasigon ang hingtungdan nga mohimo og pagbag-o sa ilang kaugalingon. Sa laing bahin, ang motabang kanila (Deliverance Team) ang mohimo usab og pagpangandam sa kaugalingon pinaagi sap ag-ampo, pagpuasa, pagkumpisal (diin mokumpisal usab ang pasyente) ingon man ang iyang banay.
Pagtulon-an
Mahinungdanon usab ang hustong pagtulon-an. Dili tanang mga pagtulon-an angayang paminawon ug dili tanang mga pagtulon-an angayan nga sundon. Kinahanglan nga linamdagan sa kahayag nga iya sa Simbahan (Katoliko) ug pinasikad sa Balaang Kasulatan, ang hingtungdan kinahanglang mahigmata sa kamatuoran nga ang sala, patuo tuo, ug uban pang mga balansayong makalaglag ang mamahimong dakong babag sa pagdawat sa makaalim nga grasya sa Dios.
Pagsaulog sa kalingkawasan Gikan sa Dios
Ang mga ritwal sa pagpalingkawas ingon man mga pag-ampo sa eksorsismo dili lang usa ka kinaugalingon kun pribado nga panlimbasog kinahanglang apilon gyud niini ang katilingban labina gyud ang Parokya aron sa ingon mas daghan ang mag-ampo, mas gamhanan kini!
Human sa Kalingkawasan, Dunay Misyon ang Tanan!
Dili paigo ang pagpalingkawas sa biktima gikan sa gahum sa kangitngit. Hinunoa, kinahanglan ang gitawag pa nila og after care. Sama sa usa ka party nga human malipay ug mangabusog ang tanan kinahanglan himoon ang pag-atiman sa lugar nga gihimo ingon usab ang bisan kinsang gitabangan sa team o sa eksorsista kinahanglan nga anaa ang follow up sa biktima ug sa espirituhanong kinabuhi niini. Kay kun simbako mapasagdan kini nan, mahimong masubli usab ang maong hitabo. Ang misyon sa hingtungdan mao nga mamahimo siyang mensahe sa kaayohan ug kalingkawasan usab alang sa uban.