Tinuod siyang higala
Siya ang mayor sa Davao City. Usa sab siya ka abogada. Siya ang labing nasuhito sa proseso sa pagkumbinser sa korte sa dili una pagpatuman sa demolisyon sa kabalayan. Hangtod nga dili masusi ang tanang alternatibo sa pagpabakwet sa mga pamilya. O hangtod nga dili pa maandam ang lugar nga ilang kabalhinan.
Pero niadtong Hulyo 1, 2011, hinikalimtan nga isip mayor siya ang tigpatuman sa balaod ug isip abogada ahente siya sa pagtahud sa mga lagda sa korte, iyang gikulata si Court Sheriff Abe Andres. Tinuod siyang higala sa pagpanlaktod.
* * *
Dihang siya pa ang kalihim sa edukasyon, giawhag niya ang pagpanalipod, pagpatigbabaw ug pagpalambo sa mga katungod sa kababayen-an ug sa kabataan sa nasud. Nangampanya sab sa pagpanday og dugang mga balaod nga mohatag og managsamang kahigayonan sa panginabuhi sa kababayen-an.
Pero wala siyay gihimo sa pagtabang, bisan gani sa pag-simpatiya na lang, sa mga babaye ug mga bata nga nipasangil sa pangulo sa ilang organisasyon, ang Kingdom of Jesus Christ (KOJC), nga nanglugos ug nidagmal nila ug nanguwarta sa ilang mga ginikanan. Tinuod siyang higala ni Apollo Quiboloy.
* * *
Isip bise presidente, nangayo siya og mas dakong budget para sa 2025 aron nga mapalapdan ang mga programa ug madugangan ang mga matabangan sa dinalian nga mga ayuda sa mga biktima sa katalagman.
Atol sa pagkusukuso sa super typhoon Carina ug pagkalubong sa baha sa dakong bahin sa Metro Manila ug Luzon niadtong Hulyo 24 ning tuiga, nibiya uban sa mga sakop sa iyang pamilya para sa ilang bakasyon sa Germany. Tinuod siyang higala ni Taylor Swift.
* * *
Human nibiya sa gabinete sa niaging buwan, kusganon siyang niawhag nga isog nga mosukol, ug dili angay nga moduko lang og paawot, ang mga Pilipino batok sa tanang mga pagsuway sa mga langyaw sa pagpanghawod sa atong nasud.
Pero nagpabilin siyang hilom sa tanang pagpanghasi sa China sa West Philippine Sea. Apil na sa labing bag-ong mga insidente sa pagbangga sa mga barko sa China Coast Guard sa duha ka barko sa Philippine Coast Guard duol sa Escoda Shoal niadtong Lunes sa kadlawon. Siya, si Bise Presidente Sara Duterte, tinuod gyod nga higala. Sa China.
* * *
- Latest
