Nganong nakalayas si Alice Guo
Niay panghitabo sa Sugbo nga mahimong makatabang nato sa pagsabot nganong, bisan sa pagkatingob sa atensiyon sa tanang ahensiya sa nasudnong gobyerno sa ka-kuwestiyonable sa iyang pagkatawo ug mga negosyo, nakalayas gihapon si Ali Guo sa Pilipinas.
Sa bakanteng luna sa barangay sa uptown sa Cebu City, nakit-an sa mga molupyo ang paspas nga pagtukod sa usa ka building. Mingaw ang lugar maong nahibulong sila kinsa ang dunay dinalian nga panginahanglan nga mogamit dayon sa pipila ka andana nga building. Pero kay wala man mahasol sa kontruksiyon walay nagtagad pagsusi.
* * *
Dayong kahuman sa building, gi-semento ang gubaon kaayo nga agianan nga nagsumpay sa istruktura ngadto sa mas dagkong kadalanan sa syudad. Nakadungog na ang mga molupyo og mga huhungihong nga dili ordinaryo nga negosyante ang tag-iya sa building: Paryente sa usa sa labing gamhanan nga politiko sa Sugbo.
Napuno dayon ang building sa mga okupante. Nagduda ang mga silingan nga dili ordinaryong mga sakyanan ang nag-sulod-gawas sa gates sa building sa tibuok adlaw ug tibuok gabii. Pero kay wala man mahasol ang ilang pagpuyo walay nagtagad sa pagsusi.
* * *
Niadtong Hulyo 21, adlaw’ng Domingo, nakugang ang mga silingan sa talagsaong kalihokan sa building: Mas daghang sakyanan ang nagsulod-gawas sa gates, paspas nga nanghakot sa mga butang ug sa mga nagpuyo. Dayong kilumkilom, abandonado nang building.
Mga guwardiya na lang ang nagtikaw-tikaw. Kinsa nitug-an sa mga nangutana nga dinali-dali ang pagbiya sa mga okupante. Computers ug ubang mga ekipo ra ang giseguro sa paghakot. Nahibilin pa ang mga kurtina ug mga higdanan sa mga kuwarto.
* * *
Pagka sunod adlaw, Hulyo 22, Lunes, gipahibawo ni Presidente Ferdinand Marcos Jr. sa iyang State of the Nation Address (SONA) nga ban sa Philippine Offshore Gaming Operations (POGO). Kay niinsistir man ang Philippine Amusement and Gaming Corporation nga wala silay gitugotan nga POGO gawas sa Metro Manila ug Cavite, mahimong ilegal nga POGO hub ang nagmingaw nang building.
Nganong mas una man silang nahibawo sa ban? Konektado ba sa kinatas-ang mga opisyal sa gobyerno nga gisayun-sayon lang ni Guo sa pagbiya bisan sa arrest warrant sa Senado ug sa Immigration Lookout Bulletin Order sa Department of Justice?
* * *
- Latest