Sa Kongreso maila kon kinsa kining mga kongresistang bulok? Diin, ultimo ang paghatag og sagradong respeto ngadto sa matag position sa napiling lider sa katawhan, diin may iya-iyang limitasiyon asa ra kutob ang badlis sa iyang responsibilidad, dapat maoy tamdan kanunay. Ug angay hatagag igong gibug-aton.
Nga sa ato pa, kon ikaw, bise presidente lang sa Pilipinas, ayaw hilabti ang trabahong iyaha sa presidente. Kay ang pagbuhat sa ingon, sama ra nga imo siyang giinsulto, imo siyang giuna-unahan sa pagdiskarte, imo siyang gipakaubos sa pagtan-aw, diin daw maoy gusto nimong ipagawas nga wala siyay alamag sa pagsulbad sa unsay pang topmost-executive nga suliran. Busa segurado gayod nga masakitan ang pinaka-boss ug mahimo rang mapatungan kag administrative case: ‘overlapping of function,’ unya masilotan.
Ug mao kini ang gibuhat ni Bise Presidente Sara ‘Inday’ Z. Duterte – ang pagbaton pirmeg respeto sa tanang obligasiyon nga nahisulod sa hurisdiksiyon ug iyaha ra gayod ni Pres. Bongbong Marcos Jr. (PBBM), sama niining talandugong situwasiyon sa West Philippine Sea or South China Sea dispute nga hagbay ra natong giatubang, diin hangtod karon wala pa gayod mahatagig tukmang sulbad sa atong pangulo, kinsa tungod sa iyang sobrang paghinalig sa Amerika, hapit pa hinuon ta mabuliyaso.
Matud pa ni Representative France Castro, si Inday usa lang ka spare tire. Busa, dili angay manghilabot unsay trabaho sa presidente. Aw, naa ra man diay kana! Unya nganong may mga kongresista mang moingon nga nangiyugpos ra si Inday, nagpabiling hilom, ug wala gyod mangitag paaging kontrahon ang Tsina? Kahinumdoman.
Duha ka tuig ang pag-antos ni Inday nga naduhig sa kapalpakan ni PBBM. Pero tungod kay iyang girespeto ang kinatas-ang otoridad niini, gisuportahan gihapon niya. Apan dihang nasinati na ni Inday nga ultimo siya, iyang pamilya ug ang atong nasod, gitraydor na sa administrasiyong Marcos, mibulag siya sa kahagsaon nang mga pungpong niini.
Ug mao nay nahimong tingog sa katawhan, kinsa mipalanog: “Kon dili na kaya nimo, ania ako aron magpakita unsaon ang pagpangulo o pag-implementar og kamandoan!”
Diin, kon buligan lamang sa Kahitas-an, dinhi masaksihan sa tanang kritiko ang iyang turno kon unsaon ang pagpahunong sa dakong away: Pinoy batok Tsina diha sa West Philippine Sea?