Instant noodles ug kape

Namahayag si Senador Nancy Binay nga kinahanglan repasohon pag-ayo ug angayan’g patas-an sa NEDA ang gilatid niini nga food poverty threshold nga P64 matag tawo matag adlaw kay wala kini motukma sa tinuod nga kantidad sa pagkaon sa kasamtangang panahon.   Bisan pa man sa sugyot sa NEDA nga ang paliton instant noodles ug 3-in-1 coffee lang matag kaon, layo gihapon sa kamatuoran ang food poverty threshold nga 64 pesos.  Apan matud pa sa akong amigo, “Motuman na lang ko sa giingon sa NEDA nga noodles ug 3-in-1 coffee lang akong ka-onon aron dili na ko matawag nga kabus.”  Saoonz!

Inhustisya-tugbang sa kakabos

Gitataw sa NEDA nga ang food and poverty threshold nga P64 wala magpasabot nga mao na kini ang budget alang sa desinte nga pagpamuyo kon dili himan lamang sa pagsuta sa ka-epektibo sa mga paningkamot sa kagamhanan sa pagpauswag sa kinabuhi sa mga kabos.  Ni’ng dugang nga pagpasabot sa NEDA, nga lisod gihapon tugkaron, tataw nga buot lang gyud niini’ng tabunan ang kakulangon sa kagamhanan pag-atiman sa suliran sa kagutom sa katawhan. Haum ang panultihon nga, “Ang tugbang sa kakabos (poverty) dili bahandi.  Ang tugbang sa kakabus mao ang inhustisya.” Fezteleern!

Ibalhin gani ang semana santa

Gikwestiyon ni Albay Representative Edcel Lagman ang motibo ni Presidente Marcos sa pagbalhin sa petsa sa pagsaulog sa Ninoy Aquino Day gikan sa Agosto 21 ngadto sa Agosto 23 kay nahasupak kini sa balaod.  Adunay legal nga basehan si Lagman.  Kon unsa man ang iyang motibo, mao kana’y nakapahinuklog sa akong amigo.  Matud pa niya, “Ibalhin-balhin man gani nato ang Semana Santa diin ang kamatayon sa atong Ginoo ang atong gisaulog ug gihandom, ang pagsaulog sa kamatayon ni Ninoy pa kaha ang dili mabalhin nga tawo ra man siya.”  Madahaan!

Ningas cogon ang pinoy

Dili motuo si Cebu City Councilor James Cuenco nga ang Cease and Desist Order (CDO) nga gi-issue sa probinsya sa Sugbo maoy hinungdan sa kalangay sa pagtiwas sa Package 1 sa Cebu Bus Rapid Transit (CBRT).  Hagbay ra’ng gi-issue ang CDO, apan hangtod karon wala pa’y hisgot kon nabuhat ba sa kontraktor ang mga kondisyones.  Grabe na tinuod ang kalangay sa maong proyekto apan matud pa sa akong amigo, “Dili kini ikahibulong kay kinaiya sa mga Pilipino ang “ningas cogon” diin maayo lang kita mosugod apan dili maantigo mohuman.”  Fishkots!

Vandalism sa lusaran?

Gikonsiderar sa Cebu City Environment and Natural Resources Office (CCENRO) nga “vandalism” ang pagpamintal sa mga bato nga nagpalibot sa Lusaran Dam. Gikahinangop baya unta sa mga barangay opisyal ang maong proyekto kay daghan man ang mobisita sa maong lugar aron mangaligo. Alang kanako, dili man tingale kini “vandalism” kay segun sa Merriam-Webster Dictionary, ang vandalism “usa man ka tinuyo ug malisyoso nga pag-guba sa publiko o pribadong butang.”  Komentaryo pa sa bayot nakong silingan, “Ingon ana jud ang tawo, ang nindot himoon’g bati, unya ang bati himoon’g nindot.” Pagkatoytoy!