Nindot nga tubag

Nakadayeg ko sa mga pamahayag ni Cebu City acting Mayor Raymond Alvin Garcia kabahin sa mga pagsaway kaniya ni suspended Mayor Michael Rama mahitungod sa pagpagamit sa Cebu City Sports Center alang sa Pasigarbo sa Sugbo.

Inay nga siya masuko ug miluwat og hait nga tubag, si Raymond kalma ra nga miingon nga “nganong dili man sab nato tugotan ang Kapitolyo nga makagamit sa Sports Center?” Iyang gipasabot nga pinaagi niini mapakita ang “unity.”

Dili gusto si Mike nga pagamiton ang Kapitolyo diha sa Cebu City Sports Center alang sa Pasigarbo sa Sugbo kay nagkasumpaki man sila si Governor Gwen Garcia, ug gani iya man kini nga gipasakaan og kaso didto sa Malacañang.

Aw, kay si Raymond man maoy acting mayor karon sa siyudad, ang iya gyud nga kagustohan ang masunod, ug dili ang kang suspended Mayor Mike.

Pero ang gidayeg gyud nako ang tubag ni Raymond dihang gipangutana siya sa mga reporters kon unsa nay ilang sitwasyon karon ug ni Mike. Matud ni Raymond, giisip gihapon niya nga sila si Mike magkaalyado sa politika.

Para nako, nindot unta nga mahilot pa kining kahiubos ni Mike ngadto kang Raymond. Nahiubos si Mike kang Raymond kay gitan-aw man niya nga sukwahi ang mga pamaagi niini nga gipatuman.

Natan-aw man gud nako nga imbes lig-on ang ilang panag-alyado sa politika alang sa eleksyon karong sunod tuig, mahuyang unya kini kon sila magkabuwag.

Usa ka higayon giingnan mi ni Raymond nga posibleng magkabuwag na gyud unya sila si Mike kay mipahibawo na man ang suspended mayor nga dili na siya maoy ka-tandem niini pagka bise mayor.

Gani, kanunay na nga magkuyog sila si Mike ug si Cebu City Acting Vice Mayor Dondon Hontiveros, nga gitan-aw nga maoy itandem ni Mike pagka bise mayor.

* * *

Saludo ko sa kapolisan nga nakahimo na og pasiunang lakang pagsulbad sa pagpanulis sa duha ka baligyaanan og mga alahas diha sa Carbon area sa Cebu City.

Na-recover nila ang Mitsubishi Adventure nga maoy gisakyan pag-ikyas sa ubang mga tulisan, ug nadakpan nila ang driver niini nga si Marcial Ponesto.

Didto sa Paknaan, Mandaue City ang sakyanan na-recover, ug nakuha pa sulod sa sakyanan ang granada, armas, ug vault nga sudlanan sa alahas.

Pero mosamot ang akong pagdayeg kon madakpan nila ang ubang mga tulisan, ug mabutyag nila nganong ang sakyanan nga gipanag-iya sa polis, nagamit man sa maong mga tulisan.

Unta, dili kay kutob ra diha ang kalampusan nila sa pag-follow up sa nahitabong pagpanulis.