Dughan dili madiktahan

Nahiuknol ang masipang pinalakpakay sa tibuok kalibotan dihang dungan sa pagdaog og duha ka 2024 Paris Olympics gold medals sa Men’s Floor Exercise ug Men’s Gymnastic Vault competition sa atong pambatong gymnast, Carlos ‘Caloy’ Yulo, mibaha usab ang personal-pangpamilyang kontrobersiya tali sa inahan ug anak – Angelica-Caloy, sa social media, diin dili unta angay iladlad atubangan sa publiko kay seguradong kuninitan sa mga marites, kinsa mahilig mopasilaob og mga sensitibong  isyu.

Hinungdan, si Caloy ug iyang Mama, nahibaw-an na hinuon nga nagkadeperensiyaay. Nasayran nga sukad pa sa sinugdanan, wala gyod makagusto ang inahan sa Filipino-Australian nga girlfriend ni Caloy. Kay sa kamoderna niining modalag sininanaan ug linihokan, nahadlok si Mama Angelica nga basin maot nga kaugmaon ang dangatan sa iyang anak.

Apan gitubag na ni Caloy, pinaagi sa social media, ang maong kabalaka sa iyang inahan. Matud niya, may kaugalingong kita si Chloe San Jose, iyang uyab. Mouban man tuod kini sa mga dapit asa siya mag-training ug hangtod na sa mga adlaw sa 2024 Paris Olympics, gikan sa plite sa ayroplano hangtod sa bayranan sa pagkaon ug sa estarang hotel, tanang galastohan gikan sa bolsa ni Chloe.

Giklaro ni Caloy, ang presensiya sa iyang hinigugma sa Paris Olympics nakahatag niyag dugang inspirasiyon-kusog-kaabtik ug talagsaong gahom sa pagpakigkombati. Hinungdan, nakab-ot gyod niya ang duroha ka kinatas-ang bantayog sa kadungganan.

Nga nakahatag og dakong garbo sa kasaysayan dili lang kutob sa iyang mga minahal sa kinabuhi. Kondili,  nahilakip sab ang atong nasud.

Mipuno sa pagpahayag si Caloy nga halos sa tanang panglantaw sa kinabuhi, managsama ang ilang panan-aw ug gibati. Sa laktod, right match sila. Happy and enjoy kanunay sa ilang panag-uban. Mao nga wala gyod sunda ni Caloy ang sugo sa iyang Mama nga palay-an si Chloe.

Hinunoa, gidepensahan ni Caloy pag-ayo iyang hinigugma pinaagi sa pagtug-an unsa kini kabuotan ug kamasinabuton sa ilang relasiyon?  Giduphan sa iyang mga pagdayeg aron dili mabun-og sa mga hugawng pangagpas gikan sa iyang inahan. Ingon niini niya kamahal iyang nobya.

Butang, nga bisan nakita na sa iyang Mama, ingon sa dili lamang gihapon makadawat sa kamatuoran. Busa nakalimot, nga kon gugma nay hisgotan, ang dughan dili gyod madiktahan.