Dili kabayran ang sakripisyo sa inahan

Subo palandungon ang nahitabo ni Carlos Yulo, ang double gold Paris Olympian ug sa iyang inahan nga si Angelica nga nagkadisgustohay tungod sa isyu nga pampamilya apan gipistahan sa katawhan sa tibuok kalibtan nga daw nalubong na ang iyang kadaugan tungod sa personal nga isyu.

Sa sinugdanan mitumaw ang isyu nga nagamit ang kwarta sa anak nga wala mananghid ang inahan. Mora'g makalagot hunahunaon nga maoy nakapasilaob sa kasuko sa mga netizens. Apan dihang gi-broadcast sa sa social media ang iyang pagkwenta sa kwarta ug naduot pagmaayo ang iyang inahan, hingpit nabalit-ad akong kalagot personal ngadto sa batan-ong Olympians. Kini ilabi na nga naay mora'g satanas sa iyang likod nga naghunghong niini nga mao ang iyang uyab nga mao untay mopatunga sa kasungian sa anak ug inahan

Foul kaayo ang gihimo sa anak kay sama ra sa iyang gilansang sa krus ang inahan kay nauwawan kini sa tibuok kalibotan ug mas sakit pa kay atubangan pa gyud sa babaye nga gikagutan sa inahan. Makaingon ta pagkawalay batasan anaka gipalabi ang babaye nga dili pa gani niya asawa kay sa iyang inahan nga misamkon kaniya sulod sa siyam ka buwan hangtud sa pagkahimugso ug pagdako ngadto na nahimo siyang gold medalist sa Olympics.

Sa usa ka typical nga pamilya naandan naman gyud nga ang inahan ang motipig sa kinitaan sa anak. Gani ang uban dili naman magpangutana asa ang kwarta basta makita lang nga naay nagamitan niini pagpanindot sa balay ug gigamit sa panginahanglan sa mga igsoon.

Isip anak ikalipay gani nga ang hinagoan gigamit sa inahan bisan sa personal nga pagpanginahanglan sama nalang sa pagpagwapa kay kini na ang panahon nga medyo makabawos sa iyang nahimo. Inay ikasakit sa buot ikalipay nalang sa usa buotan nga anak.

Ang kalipay nga bation sa inahan nga nakatilaw sa hinaguan sa anak maghatag og mas dakong katagbawan sa anak Apan naa man puy mga anak nga hangolan ug dako na kaayong isyu kong hilabtan ang iyang kinitaan. Busa hilas kaayo ang nagkondenar o nag-bash sa inahan nga nakagamit sa kwarta sa anak. Unsa man diay gusto ninyo magpabiling bulingit ug kakha tuka ang inahan kay dili pahilabtan ang kita anak?

Ikaw anak makaako ka pagtan-aw sa imong pamilya nga magsuwa og asin ug magsul-ob og biste nga kuspaw kay lagi bawal nga mogamit sa kinitaan? Sa kadako na sa kwarta sa anak wala pa gani sila makapalit og sakyanan ug ga-commute pa sila kada adlaw. Sa dihang nagsugod pa sa pagkab-ot ang anak sa iyang damgo ang pamilya ang iyang kauban, karon nga multimillionaire na ang iya nang uyab ug ang ubang mga tawo nga dili niya ig unsa.

Kuyawa kong magdaghan nga ma itsapwera ang ginikanan kong ang anak mokalit og ka adunahan tungod sa kabantog niini kay lagi usa siya ka malamposon nga atleta sa kalibotan.

Bisan hutdon pa na nimo ang imong kabtangan dili na makabayad sa sakripisyo sa usa ka inahan. Mag-unsa ang imong mga bulawang medalya kong dili nimo hatagan og bili ang imong inahan.

Hinuon mopatigbabaw gihapon ang dugo sa pamilya nga mohilot sa mga samad nga napagrabe sa kahakog ug dakong garbo sa matag usa.