EDITORYAL - Naay problema sa solusyon

Sa miaging mga adlaw gibahaan na sab ang nagkalain-laing mga dapit sa Metro Cebu, partikular sa Cebu City ug sa Mandaue City.

Didto sa kaulohan atol sa pagigo sa super typhoon Carina, bisan wala kini motugpa sa kayutaan sa Luzon gilunopan og maayo ang Metro Manila ug ubang mga probinsya didto.

Dali kaayong nakapanukot ang mga tawo pinangulohan sa pipila ka mga politiko nga dili kaalyado sa kasamtangang administrasyon kun naunsa naman ang mga flood control projects sa gobiyerno.

Daghan kaayo ang napurhisyo sa baha, mga sakyanan napagngan ug makina ug nangagub, samtang daghang mga negosyo sab ang naapektahan tungod sa pagsulod sa tubig baha diha sa ilang mga tindahan.

Dinhi sa Cebu City, misaka og maayo ang tubig baha gikan sa mga sapa ug niawas padung sa kadalanan.

Partikular sa mga lugar nga hapit na mag 20 ka tuig nga pirmeng lunopan og baha matag kusog ang uwan may bagyo man o wala mao ang dalan V. Gullas, Bonifacio, MJ Cuenco Avenue, Escario Street ug uban pa.

Mga dalan nga makadaghan na sab gibuhatan og mga kanal ug imburnal apan mura lang gihapon og wala buhati kay ini og kusog ang uwan moawas man gihapon ang tubig.

Samtang sayon ra kaayong makapanaway sa gobiyerno ug dudahan dayong dunay pagpangawkaw sa pundong gitagana para sa mga proyekto niini kontra sa baha, maayo sab tingali sutaon kun nganong bisan aduna nay mga imprastrakturang gitukod kontra baha, wala man gyud hingpit nawala ang maong problema.

Maayo tingaling tan-awon kun unsa ka grabihon na karon ang mga negatibong epekto sa mga natural nga phenomenon sama nianang uwan, bagyo man o ordinaryong uwan.

Ug kun haom pa ba ang kasamtangang sistema sa paghimo og mga pamaagi pagbatok niini, basin og gitihik o kuwang ang pundo, kuwang og political will, dili na epektibong desinyo sa mga imprastraktura, lugak nga implimentasyon sa mga balaod batok sa pataka’g labay og basura ug daghan pang posibleng rason.

Kun magpabiling dili makita sa mga hingtungdang ahensiya kining mga “apan,” dili masulbad kining problemaha kada tuig. Sayang lang ang kwarta sa katawhan. Pangitaa ug tun-an asa gyud nasayop di pataka og yawit.