EDITORYAL - Respeto paigo na

Naukay ug nasaba ang social media dinhi sa Sugbu ug naabot sa lagyong mga lugar ang viral post sa usa ka LGBTQ bahin sa laing miyembro sa ilang komunidad nga gialegar nga mipabarog og taas nga oras sa usa ka food server sa usa ka kan-anan sa usa ka mall sa Cebu City.

Ang isyu matud pa, may kalabotan kini sa sayup sa batan-ong lalaking food server nga gi-address kini og “Sir.” Matud pa sa paghulagway sa nag viral nga picture, “gi-lecture” ang server sa maong LGBTQ.

Daghan ug sagul-sagol nga mga nanggawas nga opinyon ug komento sa mga netizens, dunay misaway ug duna say wala kasabot sa isyu. Apan klaro nga ang komento gibase lang sa nakita sa post ug wala sa aktwal nga hitabo.

Ang LGBTQ community naglimbasog sa pagkab-ot og hustisya para sila trataron og patas sama sa mga babaye ug sa mga lalaki. Trataron og patas ug dili para magpatahod.

Mao bitaw nga dunay mga lehislatibong giduso, mga kalihokan para kanila para mapasabot ang publiko sa ilang kawsa apan dili kini mahitabo sud lang sa usa ka pamilok.

Matag buwan sa Hunyo gisaulog ang gitawag nga LGBTQ Month o Pride Month agi og pagtimaan sa gitawag nga Stonewall Uprising niadtong 1969 didto sa Manhattan sa Amerika.

Simbolo kadto sa ilang pakigbisog batok sa mga pagtamay ug wala sa lugar nga kasuko sa katawhan diha nila.

Wala kini magpasabot nga ang katilingban nakahibalo sa tanang gustong mahitabo sa maong komunidad kay pagkatinuod dili obligado ang mga tawo nga manginlabot kay dili man tanan maapektahan sa maong kawsa. Gani ang media wala man sab magkulang sa pagpahibalo sa publiko kabahin sa ilang kawsa. Daghan kanila mga celebrities na karon ug dunay mga pangalan sa katilingban.

Mabasol niini kining kakulang sa impormasyon kabahin sa LGBTQ  maong aduna pa gyuy mga tawong hilasan kanila ug sa ilang mga gipangbuhat. Apan dili kini sala sa mga wala makahibalo sa ilang sentimiyento ug dili sab angay ipamugos.  Tingali paigo na ang pagrespeto aron ipakita nga patas ang tanan. Kay ang di makamaong morespetar, di sab makapaabot nga respetuhon.