Designated survivor

Hingpit nang nabungkag ang orihinal BBM-SARA Uniteam human tabangig kulata si Vice President Sara ‘Inday’ Z. Duterte halos sa tanang cabinet members, senadores, congressmen ug ubang kadagkoan sa administrasiyong Marcos, kang kansang prinsipyo sa kinabuhi humok rang matental sa minilyong salapi.  Lalim bay, nagtrabaho man untag maayo-tinarong si Inday, unya nganong mao man hinuoy pirme nilang gikontrahan? Fair ba?

Ug kini maoy usa sa mga hinungdan nganong nakahukom si Inday nga mobulag na sa Uniteam. Sa usa ka ambush interview tapos siya moresayin sa gabinete ni PBBM, gipangutana siya sa taga media bahin sa unsa nay status sa BBM-SARA Uniteam. Diin, iyang giklaro nga maayo ra kadto sa 2022 election campaign period. Ug human niadto, wala na!

Hinungdan, sa milabay'ng 2024 Pambansang Palaro opening ceremony didto sa Cebu City Sports Complex, dili mo na makita si Inday sa kiliran ni PBBM. Kay mas gipalabi, ang pagduaw sa mga nasakit nga atleta-trainor-coach dito sa tambalanan. Unya misulod siya sa Basilica Minore del Santo Niño, nag-ampo alang sa kalamposan sa nahisgotang Pambansang Palaro.

Usab, siya mipahibalo nga dili motambong sa ikatulong State of the Nation Address (SONA) ni Presidente Bongbong Marcos (PBBM) sa Hulyo 22, 2024, diin seguradong tapok-an sa mga politikong balimbing, kinsa kaniadto mga Dilawan, Pinklawan ug anti-Marcoses, pero karon pulos na pro-Marcos.

Ug hingpit giselyohan ni Inday ang pagkabungkag sa Uniteam dihang sa laing ambush interview, siya mitug-an: “No, I will not attend the SONA.” Unya mideklarar: “I am appointing myself as a designated survivor.”

Makonsiderar bayang ‘designated survivor’ si Inday. Sanglit, sulod sa duha ka tuig, nga gitabangan siyag gubat sa administrasiyong Marcos gamit ang mga luod-linuog-hugawng pamaagi, nakalingkawas ghapon si Inday sa katraydor sa mga bitin ug nagkadaiyang matang sa mananap.

Naluoy si Inday nga nagtan-aw sa delikadong kahimtang sa atong nasod ug katawhan nga anaa gikuptan sa mga hagukang kamot ni PBBM. Gusto siyang maluwas ang tanan. Busa, ubos sa mga palad ni PBBM, giandam ni Inday ang mga kamot niyang binukhad. Aron ingkasog dili na makapiog sa kabug-at si PBBM, anaa si Inday nga mosangga-mosapnay ug kitang katawhan, kinsa nangandoy og good governance, masalbar.

Ug sama ni Inday, kita naka-survived!