Gubat nga wala kapanukad

Kutob ra gyud sa deklarasyon sa gubat batok sa baha ang mga lokal nga kagamhanan ilabi na sa dakbayan sa Sugbo nga hangtud karon wala gihapoy kalamboan kong modaug na ba ta o ba kaha nasugdan na ba ang giyera.

Bitaw gihatagan na kita og kahigayonan sa kinaiyahan nga makapanukad sa paghimo og pamaagi unsaon padaug batok sa baha, ang el niño nga milanat og taas nga panahon.

Unta gipanghabwa na niadtong panahon sa ting-init ang mga basura nga nakabara sa mga agianan sa tubig ug gipalawman ug gipalapdan ang mga sapa aron segurado gyud nga wala nay problema init abot na sa ting ulan nga maoy sinugdanan sa gubat.

Apan dihang nipahuway ang uwan ug nibanos ang init oy nipahuway man pud ang mga tawo sa pagtrabaho, seguro dunay uban nga nagpadayon apan dili ingon niana ka pursigedo o basta lang gud ingnon nga nagtrabaho. Apan hinay kaayo nga naapsan gyud sa panahon kay kong nagdali pa sa tahas dili gyud maapsan sa uwan.

Bitaw makaingon ko nga kong manghagit kita nga gubaton ang baha seguradohon nga dili lang kutob sa baba kay segurado ilampaso gyud ang mga tawo labi na kong kutob lang sa baba wala sa buhat.

Nabatasan na man gud sa mga tawo nga ayha na molihok kong apiki na sa panahon ug ang resulta magkayamokat na hinuon. Kahinumduman maayo kaayo ang plano ug ang mga estratehiya apan kutob lang didto. Gani adunay mga dapit nga gipangbuhatan na og nga drainage sama sa Lapu-Lapu pero susama ra man gihapon ang sitwasyon bahaan ra man gihapon.

Bisan unsaon og lihok sa kagamhanan kong walay kooperasyon sa katawhan masayang lang ang tanan, kinahanglan nga magtinabangay ang tanan kay lisod na kaayo ang panahon karon dako og kalainan kaniadto. Mas nagkaisog ug nagkapeligro.

Dili ka tiaw tiawan ang panahon ug labaw na nga dili kapangantihan busa inay gubaton, angayan respetohon nato ang kinaiyahan pinaagi sa paghimo sa mga butang nga magprotehir sa kalikopan.