Nganong nakuwang ang sukod
Kon nakadaug ka sa hosting sa Palarong Pambansa 30 ka tuig human sa kataposang pagduma sa nasudnong mga duwa, ug gihatagan og igong lugway sa pagpangandam, pero nauwawan kay kuwang ang sukod sa rubberized track oval, ang sentro sa kalihokan, angayng mamalandong sa imong liderato, o kakuwang ini.
Labi na kon ang bulilyaso nisunod sa imong pagtukod og ospital nga wa mahuman bisan P2 bilyones na ang gasto ug siyam ka tuig nang nilabay kay wa magtungod ang mga haligi, mas dako ug mas dinalian ang panginahanglan sa paghinuktok di ba ikaw ang problema.
* * *
Diin nagkuwang si suspended Cebu City Mayor Mike Rama sa pagpangandam sa Palaro karong tuiga? Atong subayon ang mga petsa:
Mayo 2023: Gipa-seradoan niya ang Cebu City Sports Center (CCSC) aron makabuylo na ang pangandam kay nitanyag siya sa pag-host sa Palaro;
Agosto 2023: Gipahibawo sa Department of Education (DepEd) nga Cebu City ang nidaog sa bidding sa Palaro hosting;
Oktubre 2023: Nidaog ang SBD Builders sa subasta pag-ayo sa rubberized track oval; ug
Enero 2024: Nakadawat ang SBD Builders sa notice to proceed uban ang 120 ka adlaw nga lugway paghuman sa trabaho.
* * *
Maklaro sa mga petsa sa ibabaw ang wa kinahanglanang kalangay:
Lima ka buwan: Mao nay gintang sa pagsera sa CCSC ug sa subasta;
Pito ka buwan: Mao nay gintang sa pagsera sa CCSC ug sa pagsugod pag-ayo sa oval; ug
13 ka buwan. Mao nay gintang sa pagsera sa CCSC ug sa pagkahuman sa pag-ayo sa oval.
Kon nalikayan ang kalangay, may igo pa untang panahon pagpuno sa kuwang nga duha ka metro sa oval nga uwahi nang nahibaw-an (usa ka adlaw na lang dayong abli sa Palaro).
* * *
Niay mga petsa nga posibleng mopatin-aw sa kalangay sa proyekto ug kapakyas pagkurihir dayon sa kuwang nga sukod:
Agosto 2023: Nibiyahe si Rama sa Los Angeles, California;
Septiyembre 2023: Nibiyahe si Rama sa Vladivostok, Russia;
Oktubre 2023: Nibiyahe si Rama sa Australia para sa Pacific Cities Summit ug sa kapin sa buwan nga bakasyon sa iyang pamilya;
Enero 2024: Nibiyahe si Rama sa Singapore;
Marso 2024: Nibiyahe si Rama sa Taiwan; ug
Mayo 2024: Dunay nasuspenso.
* * *
- Latest