Nindot man o laksot basta tinuod ibalita gyud na!

Walay pagpanuko nga gibirahan ni Cebu City Acting Mayor Raymond Alvin Garcia atol sa gipahigayoan nga command conference nga gitambongan sa tanang mga stakeholder sa Palarong Pambansa 2024 human wala siya makauyon sa gipagawas nga report sa ubang mga media outlet mahitungod sa sitwasyon sa mga billeting quarters sa nagkadaiyang delegasyon sa national games nga nakasinati og suliran sa supply sa tubig.

Sa wala pa ang naasoy'ng pagpangasaba ni Garcia sa mga sakop sa media, maayo ra man unta ang iyang buot nga miabi-abi sa mga tigbalita atol sa nahaunang kalihokan sa Plaza Sugbo diin gipahigayon ang turnover sa walo ka mga patrol cars ug mga armas ngadto sa kapolisan sa dakbayan. Human niini ni-grant pa si siya og ambush interview ug gitubag ang mga pangutana sa mga isyu sa Palarong Pambansa.

Apan nabatyagan na daan nga dismayado na siya sa mga major issues nga napatik na sa mga pamantalaan nga alang sa acting mayor naghatag og negatibong impression sa Cebu City isip host sa kinadak-ang tigi sa paugnat sa kusog sa nasod, in fairness gipatigbabaw niya ang iyang pagpakigsandurot sa mga tigbalita niadtong higayona.

Human sa ambush interview, miingon ang usa sa sinaligan sa buhatan sa acting mayor nga gidapit niini ang mga sakop sa media sa pagtambong sa meeting didto sa ikaupat nga andana sa legislative building diin gitambongan sa mga opisyal sa PNP, BFP, ug mga departamento nga nakatutok sa Palarong Pambansa.

Unang gitawag niya ang pangulo sa CCDRRMO kinsa gidayeg ang serbisyo aron maseguro lang ang kaluwasan sa mga delegado. Apan luyo sa iyang pagdayeg ngadto sa mga nagserbisyo sa Palaro, ang iyang pagbirada sa media nga nangita lang matud pa og sayop o mga negatibong balita, inay kadtong mga positibong panghitabo ug ang labing bug-at nga iyang giluwatan nga pulong ang giingon niini nga nagpakatap og fake news.

Gihangyo nako ang usa sa sinaligan sa buhatan sa acting mayor nga i-single out ang media outlet nga nagpakatap sa mga fake news kong duna man kay unfair sa uban nga mga media nga nagtinarong sa serbisyo. Apan gi-generalize niini ang media sa iyang birada nga dili gyud makiangayon ang akusasyon sa wala maghimo sa ingon.

Isip tigbalita nga nakatutok sa Palaro, mas gihatagan nako og gibug-aton ang mga maanindot nga panghitabo. Gani akong gipakita sa among platform ang transformation sa mga tunghaan nga mora'g nahimong hotel sa kanindot ug uban pa nga makatabang pag boost sa imahen sa dakbayan.

Kon na-report man sa ubang media outlet ang problema sa tubig sa mga billeting areas bisan og nasolusyonan dayon apan dili kana fake news kay tinuod man pud nga naay ingon niana nga issue, dili kini angayan nga ikasuko, inay magpasalamat pa gani nga naay ingon niini nga balita aron maaksyonan dayon.

Ang trabaho sa media dili lang pagbalita sa mga nindot kon dili apil na ang bati, dili man kini hinimo himo o fake news kay ang mga sakop sa media naghago intawon sa pagkuha sa mga kasayoran nga angayan masayran. Mao bitaw nga aron dili one sided maningkamot intawon ang mga reporters sa pagpaabot ngadto sa mga hingtungdan aron makuha ang side ug maaksyonan ang problema.

In fairness ni Garcia, dali ra baya ni siya maduolan sa mga tigbalita ug motubag bisan unsa nga pangutana. Apan nagpadala lang gyud siya sa iyang gibati ngadto sa media niadtong tungora ug nalimot nga sama nila nagserbisyo usab ang mga tigbalita ilabi na niining Palarong Pambansa.

Kanang dapiton ka nga motambong sa usa ka kalihokan ug didto labhan sa kasaba bisan og dili ikaw ang giigo apan kay gi-generalize ang organisasyon ug wala tay kahigayonan nga makasulti kay audience ra ka, aw walk out nalang. Mao kini ang gihimo sa mga tigbalita niadtong tungora kay magpaabot nga almirolan pa.