Kalabot sa Incubus ug Succubus nga pag-atake

Kun buot hunahunaon ang mga demonyo ug mga dautang Espiritu walay gender. Dili sila lalaki o babaye sanglit mga espirituhanon man sila. Apan sa tinguha nga sakiton ang tawo nga pinalangga sa Dios mamahimo silang mo-assume sa gender sa usa ka lalake o babaye aron hasion ang tawo. Gitawag kini og Incubus ug Succubus nga mga Espiritu. Incubus man o Succubus managsama ra silang mga demonyo nga mo feed in sa sexual energy sa biktima. Ang incubus mogawas ingon nga ambongang lalaki nga moatake panahon sa pagkatulog sa usa ka babaye. Kun ang biktima motugot sa maulagong pagbanhig sa incubus mahitabo ang pakighilawas nga sa ngadto ngadto ang incubus mopagawas sa iyang tinuod nga bayhon ug modagmal kaniya. Mao usab kini ang pamaagi sa succubus. Mogawas siya ingon nga maanyag nga babaye ngadto sa nagdamgo nga lalaki ug sama sa incubus ang mopakita sa iyang tinuod nga bayhon aron dagmalan ang lalaki. Sa laing bahin, kun ang mga biktima magdumili sa maong buhat sa pakighilawas, mahitabo man ang usa ka pagpanglugos niini. Adunay sleep paralysis nga mahitabo ug bisan gani intawon ang pag-ampo mahimo mang malisud kaayo pagahimoon.

Unsay angay buhaton? kinahanglang makit-an ang hinungdan niini. Mahimong naglangkob kini sa usa ka occult third eye nga maoy nakapahimo sa biktima o mga biktima nga nalambigit sa kalibutan sa mga Espiritu. Dugang pa, mahimong ang kinabuhi nga nga naka sentro sa sekswal nga kahilig nakapadugang sa maong pag-atake. Dugang pa niini, angayang himoon kining mga mosunod nga mga praktikal nga mga lakang.

1. Makanunayong pagkompisal.

2. Pagpanguros sa paagi nga maampoon ug matinahuron sa dili pa matulog.

3. Solemneng pag-ampo sa Amahan Namo

4. Matinahurong pag-ampo sa Maghimaya ka Maria.

5. Eksorsismo pinaagi sa tabang sa mga eksorsistang gitahasan.

6. Kun ang pagpanghugpa o infestation anaa sa lugar o panimalay mismo kinahanglang mobalhin na lang ang biktima og laing pinuy-anan.

7. Pagbendita sa higdaanan.

Pahinumdom: Kun ang dapit mismo nagkinahanglan og eksorsismo buhaton gyud kini apan kun nahimong pakyas ug napamatud-an nga ang suliran sa dapit gyud mismo ug dili sa tawo nan, mas praktikal nga mobalhin na lang gyud og pagpuyo.