Kinopyahay sa pataka
Dunay tulo ka problema ang pasidaan ni Senador Imee Marcos nga nameligro ang Pilipinas sa hypersonic missile attack sa China tungod sa problema sa West Philippine Sea (WPS) ug sa mga baseng militar nga gihimong EDCA sites nga magamit sa Amerikanhong mga sundawo, apil nang Mactan Air Base sa Sugbo:
Una, wa siya magtagad paghisgot diin niya mapuniti ang kasayuran;
Ikaduha, wa magkadimao ang iyang mga detalye (25 kuno ang target bisan siyam ra ang EDCA sites); ug
Ikatulo, ang pasidaan kinopya ra gikan sa iresponsableng vloggers sa mga Duterte.
* * *
Ang vloggers igo ra sang nisunod sa pasidaan nga gamitan ta og armas nukleyar sa China nga gibalikbalik ni kanhi Presidente Rodrigo Duterte, kinsa way kukaikog nga nitila sa lapalapa ni Chinese President Xi Jinping ug ni-surender sa WPS:
Nikumpisal pa ganing wa siyang kahibawo hain ang Ayungin Shoal; ug
Klarong wa kahibawo unsay kalainan sa Scarborough Shoal, nga gideklarar sa Permanent Court of Arbitration nga common fishing grounds sa mga nasud nga nangangkon sa nagkalainlaing bahin South China Sea, ug sa WPS nga eksklusibong teritoryo sa Pilipinas.
* * *
Ang ka-walay sukaranan sa panghudlat ni Duterte sa armas nukleyar karibalan lang sa kalutaw sa panghadlok ni Imee sa hypersonic missiles:
Samtang nangangkon ang China nga malampuson ang pagsuway sa ilang hypersonic missiles, mga eksperto nibutyag nga ang ilang test niadtong 2020 wa kaigo sa target (40 ka kilometro ang sipyat);
Ang hypersonic Kinzhal missiles nga gilusad sa Russia niadtong 2023 pulos nasagang sa Patriot battery sa Ukraine; ug
Ang pag-insistir nilang Duterte ug Imee sa sayop nga propaganda maoy dugang ebidensiya asa sila kapusta.
* * *
Samtang nipasalig si Imee nga di motalikod sa mga Duterte bisan gideklarar nang Bise Presidente Sara Duterte Carpio nga patay ang UniTeam, ang iyang Partido Nacionalista nakig-alyansa sa Partido Federal ni Presidente Ferdinand Marcos Jr. aron maapil si Imee sa senatorial slate sa administrasyon.
Gawas kon tinuod ang pagduda nga drama ra ning pakiglalis sa iyang manghod, mameligro si Imee nga premyohan sa makinarya sa Malakanyang sa maniobra nga gitawag og junking. Ug napamatud-an sa nangaging mga eleksiyon nga ang mga botante nibasura sa mga politikong namangka sa duha ka sapa.
* * *
- Latest
