EDITORYAL - Ayaw intawon amonga ang mga kahoy

Makita na bisan asa ang mga nagkadaiyang mga posters sa mga nangambisyon og pwesto para sa umaabot nga eleksyon sa Mayo sunod tuig.

Hinuon dili pa kini matawag nga campaign posters kay wala man niawhag sa mga tawo nga botari ko o botari mi. Ang ilaha lang mao ang ilang mga dagway, pangalan, ug mensahe ngadto sa mga makakita o makabasa.

Daghan na kini sa mga kilid sa dalan ilabi na sa mga national highways . Sagad mga politiko nga incumbent nga senador o ba kaha kanhi senador kaniadto.

Nagpakatawa sila sa mga tawo nga makabasa, kung wala pa naghinangat ang eleksyon dili man ni sila makamaong motimbaya o mopahimangno sa mga tawo ilabi na sa motorista.

Apan wala man tuod kini gidili kay wala man sila mangampanya kay mura ra man og ilang gipaila-ila ilang kaugalingon ngadto sa tanan, kabalo naman ang tanan kun unsa ilang tumong.

Wala unta ni problema kung wala lang pud nila gipamilit o gipanglansang diha sa mga punoan sa mga kahoy sa daplin sa dalan ang ilang mga dagway.

Daghan na kaayo ani karong mga posters nga gipangtapot og lansang diha sa mga kahoy, dili ba makadaut man kini? Dili ba kaning mga lansang nga pangtayaon kadugayan makamugna man kini og kadaut sa mga himsog unta nga mga punoan sa kahoy?

Hain naman ang Department of Environment and Natural Resources nganong wala man gyud motingog batok niini? Unsa may gibuhat sa mga lokal nga kapolisan ug mga lokal nga mga kagamhanan bahin ani? Kaning mga gipangsuholan pagpamutang ani maoy sad-an, dili ang kung kinsa ang naa sa posters. Kaning mga sinugo maoy angay pangdakpon ug pamultahon tungod sa ilang pagguba sa kinaiyahan.

Ang mga LGUs pwede baya gyud unta mobadlong, apan klaro man nga mahadlok sila aning mga naa sa mga posters kay naa man sa taas, usa pa, basin mga tigpaluyo sila nila o ba kaha nagplanong mopaluyo aron makapangayo og pundo para sa kampanya.

Bahala na og mangamatay ng mga kahoy, bahala og unsa pa nang mga balaora. Naa nalang sa tawo kun makonsensiya, mura og ingon ana ilang gustong ipasabot.