Ning bag-o, nagkita ang kadagkoan sa Cebu Ports Authority (CPA) ug si Cebu City acting mayor Raymund Alvin Garcia aron tukion ang gikasungian sa duha ka mga kampo partikular niini ang kanang luna atubangan sa Cebu City Hall padung sa dagat.
Kun kahinumdoman, ang Campaña Maritima , mechanical parking ug ang Puso Village nga gipalambo ug gitukod sa siyudad naa sa luna nga giangkon sa CPA nga ilaha. Ang karaang building Campaña Maritima gusto nga palambuon sa siyudad tungod sa kasaysayan niini ug aron maapil sa mga giampingang kabilin sa siyudad, apil sab sa gikasungian ang gitukod nga mechanical parking ug ang Puso Village sa lugar.
Ang duha ka kampo gikan pa sa pamunoan kaniadto ni kanhi mayor Tomas Osmeña ug sa gisuspensong si mayor Michael Rama karon ug mga kaniadto nagdumala pa sa CPA miabot sa puntong nagkinihaay bahin niini.
Si Garcia nakigkita kang CPA General Manager Francisco Comendador III, malaumon nga human sa ilang dayalogo sa kadagkoan sa CPA, mahatagan na og katin-awan ang mga isyu bahin niini ug malaumon siya nga pabor kini para sa tanan.
Apan kun kaniadto sa pagsugod palang unta nag-atubangay ug nagestorya og tarong ang duha ka kampo inay "magpatas-anay og ihi" dili na unta kini mosangpot pa sa panagbikil ug walay kwarta sa katawhan nga nausik tungod aning gipang-ugmad nga mga proyekto ug imprastraktura nga posibleng ipaguba lamang kun pananglitan mopagawas og desisyon ang korte bahin sa mga tagsa-tagsa ka mga kasong gibato sa usa’g-usa.
Ikonsiderar sab unta nga daghang mga tawo ang nasagmuyo anang gitukod nga extension sa pantalan diha maong dapit kay naandan na kining suroyanan sa mga tawo ilabi na panahon sa gabii.
Ang lugar mao ray labing duol nga mahimong masuroyan sa mga tawo nga nag-atubang sa dagat, kay gikan sa baybayon sa north reclamation area sa Mabolo hangtud sa luyong bahin sa Plaza Independencia sa Cebu City, dili masuroyan sa mga tawo kay gihimo man kining pantalan. Kanang giilogang luna sa CPA ug siyudad atubangan sa Cebu City Hall mao nalay nahibiling “waterfront” sa siyudad nga pabor para sa tanan, tungod kay layo na kaayo kun sa South Road Properties ug wala say daghang pasaheroan nga molabay didto.