Aprobado na sa ikaduhang pagbasa sa Ubos Balay Balauranan ang pag-usab sa Rice Tariffication Law (RTL). Gusto sa mga magbabalaud nga ibalik na ngadto sa National Food Authority ang gahom sa pag-angkat ug pagbaligya og baratong bugas sa publiko panahon sa emerhensiya tungod sa pagsulbong sa prisyo sa bugas sa merkado.
Ang RTL giusab human gihatag ngadto sa pribadong magpapatigayon og bugas ang kontrol sa pag-angkat og bugas sa gawas sa nasud niadtong tuig 2019. Gilugwayan usab og unom ka tuig ang pagkabalido sa Rice Competitiveness Enhancement Fund (RCEF) ug gidugangan ang pundo niini gikan sa P10B - P15B.
Gidali sa mga kongresista ang paglantogi sa RTL aron masulbad dayon ang pagsaka sa prisyo sa bugas sa merkado pinaagi sa pagtugot sa NFA nga mabalik ang price stabilization ug supply regulation nga functions niini.
Ang pinakauwahi nga prisyo sa bugas anaa sa tag P50-P65 matag kilo matud sa Philippine Statistics Authority. Si House Speaker Ferdinand Martin Romualdez miingon nga ang pag- usab sa RTL makapakunhod sa prisyo sa bugas ngadto sa ubos sa P30.
Ubos sa balaudnon, gitugotan ang NFA sa pagpanghilabot sa merkado ubos sa direksiyon sa National Price Coordinating Council (NPCC) panahon sa emerhensiya sa pagkaon mugna sa kakuwang sa bugas ug aron masustiniran ang pagsaka sa prisyo sa bugas. Ang NPCC gilangkoban kini sa mga economic managers sa nasud.
Ang gamhanang NFA adunay role aron maseguro ang pagkaon ug seguridad sa bugas matud ni Ibon Foundation Executive Director Jose Enrique A. Africa ngadto sa Business World. Dugang pa niya nga kun sulbaron man sa gobyerno ang prisyo sa bugas kinahanglan nga dili lamang kini kutob sa pagbalik sa regulatory functions sa NFA. Gisugyot ni Africa nga minusan ang pagsalig sa nasud sa pag angkat og bugas sa gawas sa nasud tungod sa kagamay sa balor sa atong peso. Kinahanglan usab nga palambon ang kapabilidad sa industriya sa sektor sa agrikultura aron mapaligon ang produksiyon sa bugas sa nasud.
Apan walay plano ang mga senador nga ibalik ngadto sa NFA ang regulatory functions ingon man ang pag-angkat ug pagbaligya og barato nga bugas sa merkado tungod kay wala na silay salig niini. Apan unsa may pilion sa mga senador ang pagbarato sa bugas o ang pagkaway salig nila sa NFA?