CEBU, Philippines — Duha ka polis ug usa ka sibilyan ang naangol human gipangligsan sa usa ka 28-anyos nga machine operator nga nakainom ug nakatulog samtang nag-drive sa iyahang motorsiklo atubangan sa usa ka kan-ananan diha sa dalan padung sa viaduct sa Barangay San Roque, Siyudad sa Sugbo Lunes sa gabii.
Ang nakadasmag kanila mao si alyas Glenn, 28, machine operator, residente sa Purok Bayabas, Barangay Lipata, Lungsod sa Minglanilla.
Samtang ang naangol nga polis pulos 28-anyos ug parehong nagranggo og Patrolman nga nadestino sa Cebu City Police Office isip beat patrollers ug kadtong sibilyan nga 57-anyos, nagpuyo sa Sacred Heart, P. Laboca Street, Barangay Cansojong, Talisay City ug usa ka massage therapist.
Nagkanayon si Police Major Jonathan Dela Cerna, Hepe sa Traffic Enforcement Unit sa Cebu City Police Office ang suspetsado nakainom ug gikapoy kay machine operator maong nakatulog samtang nagmaneho sa iyang motorsiklo.
Unang naigo sa suspetsado ang 57-anyos nga massage therapist dayon naapil ang duha ka mga polis nga adtong higayona nagpahigayon og foot patrol. Ang usa sa mga polis miliki ang bukog sa tiil. Ang mga naangol apil na sab ang suspetsado gidala sa tambalanan.
Pasakaan og kasong Reckless Imprudence Resulting to Multiple Physical Injuries and Damage to Properties ang suspetsado.
Awhag ni Dela Cerna sa katawhan nga kun makainom man gani dili gyud pugson og biyahe apan ug dili kalikayan unya makabati og duka mohunong sa luwas nga lugar, motagpilaw kadali hantod nga makabawi sa kusog ug dili na magduka.— IBM BANAT NEWS