EDITORAL - Marcos-Duterte Unity kabungkagon

Murag gipistahan sa social media ang video nga nagpakita kang Bise Presidente Sara Duterte nga mi-walkout sa usa ka opisyal nga kalihokan nga iyang gitambungan kauban si Presidente Ferdinand Marcos Jr. ug sa kapikas niini.

Ang pag walkout matud pa may kalabotan kini sa pamahayag ni First Lady Liza Araneta Marcos sa dihang kini giinterbyu sa usa ka sikat nga tv host diin way lipud-lipod nga mipadayag sa iyang kasagmuyo ug kahiubos ngadto sa bise presidente.

Ang kapikas sa presidente namahayag sa maong interbyu nga wala siya malipay ug nasakitan siya sa gibuhat bise presidente nga pagkatawa atol sa pagtambong niini sa rally nga gipasiugdahan sa iyang mga igsuon ug amahan nga si kanhi presidente Rodrigo Duterte didto sa Davao nga diin gitawag naulahi ang iyang bana nga “bangag” nga nagpasabot “high” sa ilegal nga drugas.

Si Liza miingon nga isip bise presidente sa nasud ug nagdawat og sweldo gikan sa gobiyerno, ug isip luyo-luyong pangulo sa nasud, dili para niya makiangayon ang gihimo niini. Sakto pud ang unang ginang sa iyang reaksyon isip asawa nga ang bana gibiay-biayan.

Apan dili siya makabuot kun unsay buhaton sa uban ilabi na kun kini igo rang mi-react sa nadungog ug nagagikan pa gyud sa amahan ang nakaingon sa maong reaksyon. Kaning Marcos-Duterte nga romansa murag padung na og aslom, aslom pa sa bunga sa iba. Ang kaniadto gipasigarbong Unity Team daw masiak na gyud sa dili pa moabot ang mid-term election (2025).

Ang alyansa sa duha maoy nagtuboy kanila ug ni landslide pa gani sa ilang kadaugan sa nakalabay nga eleksyon. Apan sa sinugdanan palang gyud baya aning ilang alyansa makita nang daan nga pang-politika ra gyud sa tumong nga buntugon si kanhi bise presidente Leni Robredo. Daan naman gud sa wala pa nahimong pormal ug opisyal ang alyansa, gisigehan na og witik ni kanhi presidente Duterte si Marcos mahitungod sa kalambigitan sa illegal drugs.

Apan sama ra og ilaha rang gipasakay ang mga tawo nga dali ra pud kaayong nikubit ug nitulon sa ilang gimik sa alyansa. Kaning bikil nilang VP Duterte ug FL Marcos personal kini kaayo ug way labot ang katilingban.