Nagkadaghan na sab ang mga libud-suroy diha sa kadalanan sa Dakbayan sa Sugbu. Gani naa ni sila halos tanang oras bisan naa pay mga otoridad diha sa ilang nahimutangan kay dili man sab sila badlungon.
Kaning mga libudsuroy dunay mangililimos, dunay manaygonay, ug dunay mga mag-inom sa dalan ug maghingos og rugby nga sagad mga menor de edad.
Dili palang dugay, dunay nag viral nga video sa barangay Apas sa Cebu City nga mga batang nanakay og pasaheroan. Kiat kaayo ang grupo ug nagsige og saba-saba samtang duna nilay nagkabyon lang sa jeepney.
Apan usa nila ang nagkupot og supot nga plastic nga gisigehan niini og hingos. Makita sa ilang mga taras nga sabog o high sila sa rugby.
Bisan kinsa nga ordinaryong tawo nga ikasakay ang mga ingon niini nga mga grupo makuyawan gyud tungod kay bisan unsang orasa pwede kining mga bataa nga ma bayolente ug manakit sa uban.
Subo kaayo nga kaning mga libudsuroy bantayan lang ang departamento sa Cebu City hall nga tighipos kanila. Dili na gani sila mahadlok bisan makakita og patrolcar nga molabang duol sa ilang nahimutangan.
Samot na kun mga barangay patrolcars lang sa ordinaryong mga oras gawas lang kun gabii nga magpasiga sa blinkers ang mga tanod kay kabalo gyud ang tanan nga mamadlong kini.
Apan sa mga ordinaryo nga mga oras, dili mahadlok kining mga libusuroy aning mga otoridad.
Kini tungod kay sayod kaayo kining mga libudsuroy ilabi na kining mga menor de edad nga gabii ra dunay manakop.
Kay mao may tinuod, dili man mamadlong nila ang mga polis, mga tanod, ug bisan unsang law enforcement personnel sama anang mga traffic enforcers kun adlawan.
Sa samang higayon, kaning mga otoridad sab dili lang sab magpakabana bisan naa na sa ilang atubangan kining mga libudsuroy, gani pangayoan pa sila og limos ani nila, unya dili man badlungon.
Mao ni ang rason nganong dili gyud mahurot ug dili mohunong kining mga libudsuroy sa ilang mga naandang buhaton sa karsada kay dili man sa tanang oras mobadlong ang mga otoridad nga makakita nila.