Si Yarik

Dunay sakop sa parokya nga gikasal og usa ka langyaw. Iyang nabana usa ka Polish National kun Polako. Taas baya gyud ang ilang giagian nga proseso sa dihang nakahukom silang magpakasal dinhi sa Pilipinas ug dinhi sa parokya.

Apan ang Polako nga si Yarik kuyog ang iyang asawa nga Bernardita mapailubon kaayong ni comply sa mga requirements ug sa proseso.

Natigayon gyud ang kasal nga malampuson. Walay daghang estorya bisan gani sa ilang simple apan makahuloganon nga reception sa luyo sa parokya nagmalampuson man.

Sa laing bahin, dunay magtiayon nga buot og espesyal apan dili maantigong mosunod sa mga reglamento. Nagpasulabi nuon ang tinguha sa dekorasyon nga buot baratohon.

Buot molahos nga walay igong sakripisyo gumikan sa proseso. Mao pa gani ang pagsugod buot naman hinuon og sayon.

Unsaon naman lang inig abot sa panahon nga dunay kalisud sulod sa kaminyoon? kining matanga sa panagtipon dili molungtad.

Labaw na nga halayo sa panalangin silang mga tawo nga buot motagamtam og langit nga dili maantigo nga mohaangop sa krus ni Kristo.

Mao nga makaingon ako nga dalaygon si Yarik ingon man ang iyang kapikas nga si Bernardita nga human sa makuti nga proseso ang madaugong nisaulog sa ilang kaminyoon.

Sa atong panahon karon, daghang mga tawo ang buot mohimo sa ilang kaugalingong justification aron mapanalipdan ang ilang hinungog nga baruganan. Kining maong hinungog nga mga hunahuna maoy nakapasamot og ut-ot sa atong nasud ug sa atong tagsa tagsa ka mga kaugalingon.

Nahanaw ang praktikalidad kay lagi ilang gilumsan ang ilang kaugalingong hunahuna ug pagbati nga ang tanang hitabo sa kinabuhi usa ka fairy tale.