Ania ang mga hinungdan nganong wa na mosugot ang Konseho sa dakbayan sa Sugbo sa gipangayo nga budget ni Mayor Michael Rama alang niining tuig 2024 sukwahi niadtong 2023.
Bisan ang mga kaalyado ni Rama sa politika way panagana nga mipung-ol sa P100 billion nga gipangayong budget sa mayor.
Si Konsehal Noel Wenceslao, chairman sa committee on budget and finance ug kauban sa mayor sa ilang partido, misalikway nga politika ang dakong hinungdan sa ilang gihimo.
Atol sa akong pagpakighinabi niya sa The Freeman Hot Seat iyang gitug-an nga "unrealistic" lang gyud ang gipangayo nga budget sa mayor.
Ilang gibasi ang ilang disisyon paglaslas sa budget sa mayor ngadto sa P25 bilyones gikan sa P100 billion sa actual revenue collection sa syudad sa miaging tuig.
Sigun ni Wenceslao, P8 billion ray actual collection sa dakbayan sa tuig 2023 ug imposible nga kapundohan niini ang gipangayo nga P100 billion.
Kun tugotan sa konseho ang kapritso sa mayor posibleng moresulta ni sa budget deficit.
Matud ni Wenceslao nga ilang nakita nga palpak ang "Sayaw sa Buhis" nga program sa syudad alang sa pagpangolekta og buhis. Ug wala sab molampos ang revision sa schedule of market value sa mga real properties sa syudad aron unta mausbawan ang buhis.
Kining duha maoy dagkong hinungdan nga kumbinsido ang konseho nga wa gyuy kwarta nga magamit aron kapundohan ang gipangayong budget sa mayor.
Namatud-an na sab ni nila sa miaging tuig diin ilang giaprobahan ang P50 bilyones nga budget apan wala gani kaabot bisan katunga nalang ang revenue collection sa syudad.
Gipasalig hinuon ni Wenceslao nga nagpabilin ilang alyansa sa politika ug suporta sa mayor.
Apan di sab sila mahimong molingiw sa kamatuoran ug sa ilang obligasyon sa publiko pagmintinar sa "check and balance" sa kagamhanan sa syudad.
Ang gihimo sa mga sakop sa konseho nagmatuod nga wala pa hingpit mapawong ang paglaum alang sa tarong ug ligdong nga pagdumala sa dakbayan.