Hustisya ug kaangayan

Oktubre 22, 2023: Ikakawhaag-siyam nga Domingo sulod sa tuig Mga Pagbasa: Is. 45;1, 4-6/Sal. 96/1 Tes. 1;1-5/Mt. 22;15-21

Maayong Balita

Segun sa naandan ang mga kaaway sa atong Ginoo ang nihimo og mga lakang aron pagbitik kaniya. Buot nila nga isulod siya sa lit-ag aron sa ingon duna silay igong sumbong batok kang Jesus.

Ang Roma kaniadto mao man ang nidominar kanila. Ug si bisan kinsang magpaka emperador kaaway man sa emperador sa Roma.

Busa ang isyu sa buhis mao man ang ilang gihimong paon kang Jesus. Kun sila tuso mas abtik ug makinaadmanon ang atong Ginoo.

Niingon siya nga kun kun unsay alang sa emperador alang sa emperador ug kun unsay alang sa Dios alang sa Dios. Kini mao ang kahulogan kun maghisgot kita og kaangayan ug hustisya.

Kasinatian

Daghan nato karon ang buot mopasiatab sa atong katungod apan ang pangutana naghimo ba kita sa atong katungdanan? Ang kaangayan dunay gipataban  nga kaakuhan.

Sama pananglit natong mga lungsoranon, ang gobiyerno dunay katungod sa pagpahamtang og buhis kanato apan sa laing bahin katungdanan niini ang paghatag sa mga sukaranang serbisyo sama sa atong kahimsog, nindot nga dalan, hamugaway nga mga tunghaan ug  hustong sweldo sa mga magtutudlo. Maingon nga katungdanan natong mobayad gyud sa buhisan ingon man mosunod sa mga gilatid nga mga balaod. Atong hinumdoman nga matag katungod dunay katungdanan.

Lihok

Karong panahona buhata ang imong katungdanan sa pagsuporta sa parokya pinaagi sa imong pag-ampo ug pag-abag sa mga programa.

Simba sa matag adlaw nga Dominggo sanglit mao man kini ang imong katungdanan ngadto sa Dios. Katungod nimo isip Parokyano nga atimanon sa Parokya ang imong espirituhanong panginahanglan.

Pangamuyo

Ginoo himoa  kaming makiangayon. Unta ihatag namo kanimo ang angayan nga pagsimba ug pagtahud. Bisan pa man sa mga higayon nga kami nahimong mapasagaron apan sa katapusan mas gipalabi mo ang imong kaluoy kay sa kaangayan.

Unta mamahimo namo kining sumbanan sa kinabuhing katilingbanon nga luyo sa kaangayan anaa ang kaluoy. Ikaw nga buhi ug hari hangtud sa kahangtoran. Amen.