Naluoy ko nga nagtan-aw sa mga kawani sa Cebu City government nga miubog sa lapokon nga kasapaan kaniadtong Sabado aron limpyohan kini sa mga sagbot.
Gawas sa mga empleyado sa Cebu City Hall, dunay daghang mibulontaryo pagtabang aron malimpyo ang kasapaan sa pamasin nga dili na kita makasinati og lunop kon mag-uwan.
Ang pagpaglimpyo sa kasapaan, gihimo na kini bisan sa panahon pa sa mga nangaging mayor, Tomas Osme?a, Edgardo Labella ug karon ni Mike Rama, apan naa gihapon ang basura.
Ngano man? Ang tubag mao nga ang katawhan, ilabi na ang nagpuyo daplin sa kasapaan moderitso lang paglabay sa ilang mga basura ngadto sa sapa, samot na og magbaha.
Nagtuo ko nga dili gyud maundang kining pagpataka og labay’g mga basura diha sa kasapaan gawas lang kon estriktohon gyud ang pagsilot sa mga masakpang molabay’g mga basura.
Dili usa kini mahimo nga ang mga kawani lang sa City Hall maoy saligan kay dili man sila makabantay sa tanang higayon. Mao nga nanginahanglan kini sa pagtabang sa mga opisyal sa kabarangayan.
Ang mga opisyal sa barangay, gikan sa kapitan ngadto sa mga konsehal, kinahanglang magmugna og grupo nga ilang kasaligan diha sa lainlaing sityo sa ilang barangay.
Mahimo nga himoong empleyado sa barangay ang tawo nga tahasan pagbantay, nga mopahimangno sa iyang mga silingan nga dili na gyud manglabay og mga basura sa sapa.
Ang mga tawo nga tahasan pagbantay sa lainlain nila nga sityo, himoong deputized sa City Environment Sanitation Enforcement Team (CESET) ug moisyu sila og citation sa mga tawo nga ilang masakpang nagpataka’g labay og basura.
Kining mga tawo nga nagpataka lang paglabay sa mga basura ngadto sa sapa, ilabi na kon magbaha na, mao kini sila ang mga wa gyuy panglantaw nga mahimong limpyo ang atong siyudad.
Para nako, dili angay’ng kaloy-on kining mga tawhana, ug angay kini sila nga estriktohon pag-ayo, kon masakpan pahamtangan og multa.
* * *
Angay gyud nga ang mga sakop sa Task Force Gubat sa Baha nga gipangulohan ni retired general Roy Cimatu ug Colonel Jefferson Omandam motinuod sa kampanya batok sa mga tag-iya og estraktura nga nakapagamay sa atong kasapaan, ug mitabon sa mga sapa.
Kinahanglan sab nga ang City Hall, pinaagi sa Business Permit and Licensing Office, motinuod nga dili na isyuhan og business permit kining mga balay-patigayon nga dili moguba sa kabahin sa ilang estraktura nga anaa na sa sapa.
Usbon nako, kinahanglang hugot sa bakus aron nga dili kita kataw-an lang niining mga tawhana.