Karong Lunes mahimo na nga mo-file sa ilang Certificates of Candidacy (COC) kadtong gusto nga magpapili pagka opisyal sa barangay atol sa eleksyon sa Oktubre 30.
Timan-i ninyo nga unom ra ka adlaw ang pagpanawat sa mga Certificates of Candidacy, gikan lang sa Agosto 28 ngadto sa Septiyembre 2.
Unta, kadtong gustong mokandidato kay aron lang makakwarta, dili na lang modayon sa ilang tinguha aron nga ang mga tawo nga sensiro sa pagserbisyo kahatagan og higayon.
Tinuod, dadu-dako na ang sweldo sa mga opisyal sa barangay karon, ug mao ni ang usa sa rason nga daghan ang gustong mahimong opisyal.
Dili ikalimod nga ang uban naglantaw gyud nga makakwarta sila kon makadaog kay nagtoo man sila nga kon dunay mga proyekto nga ang barangay, makakwarta sila gikan sa komisyon.
Daghan ang matinud-anong moserbisyo para sa publiko apan unsaon man, dili sila makadaog tungod kay way kwarta. Dili ikalimod nga daghan sa mga botante ron, mangita na g kwarta.
Ikaduha, kon eleksyon sa barangay, mas bentaha kon daghan ka g mga paryente ug mga amigo kay sila mobotar nimo bisan og nasayod sila nga dili kaayo ka makamao.
Karon gud, daghan sa mga botante mobotar sa usa ka kandidato kay kini ilado, sama sa artista. Aw, suma gud, kuhai ninyo og base si Robin Padilla, taas kaayo g botos.
Dili pagsaway sa iyang personal nga pagkatawo, apan para kanako si Padilla dili gyud haum nga mahimong senador kay makita bitaw ninyo sa mga hearing sa Senado.
Kon executive functions pa tingali, sama sa mayor, ug konsehal ba sa siyudad o lungsod, pwede ra si Robin, apan pagka senador dako ra kini nga posisyon para niya.
Nagpasabot kini nga daghan sa atong mga botante karon, mobotar na sa usa ka kandidato kay ilado. Kaniadto sa bata pa ko, ang mga senador, ngilngig kaayo uy.
Nahinumdom mo nila ni Jovito Salonga, Gerry Roxas, Eva Estrada Kalaw, Serging Osme a, ug daghan pa nga mga national officials.
Sa barangay hinoon kaniadto, daghan sab ang mga opisyal nga kuwang og kahibawo, ug makasabot ta nga tungod kay way sweldo kaniadto, way ganahan mangatungdanan.
Pero karon, angay na gyud nga ang mga mangatungdanan sa barangay, kinahanglang makamao kay duna nay mga balaod nga estriktong ipatuman.
Mao nga karong eleksyona, unta ang mga botante kinahanglang mohimbis na gyud pag-ayo sa mga kandidato nga ilang botohan sa umaabot nga eleksyon.
Tan-awa ninyo kanang mga kandidato nga buotan, dili kiriwan, ug maayo moserbisyo, sama sa pag-atiman sa mga pundir ninyo nga suga sa poste, dili kay moserbisyo lang kon duol na ang eleksyon.