Yukbo sa kapolisan

Akong yukbo sa kapolisan sa dakbayan sa Sugbo, labi pa sa Labangon Police Station nga gipangulohan ni Police Major Angelito Valleser, sa kasulbaran sa mga tanghaga nga naglimin sa kaso sa linuog nga pagpatay sa 19-anyos nga si Reah Mae Tocmo.

Bisan sa daghang mga kasayuran nga mitumaw diha sa mga sibyaanan sa radio nga daw nagpista, nag-ilog kinsay dunay bag-ong angulo, wala malingla ang mga imbistigador ug nagpabilin silang focus sa imbistigasyon basi sa mga ebidensiya nga ilang nahuptan.

Human sa dul-an sa usa ka buwan sukad mahitabo ang krimin, natumbok sa kapolisan kinsay mamumuno ug napugos ni pag-angkon. Si Simeon Gabutero mikumpisal sa kapolisan nga siya maoy nagpatay sa dalaga ug milabay sa patay’ng lawas niini didto sa Barangay Tisa, Cebu City sulod sa usa ka karton.

Ang pag-angkon ni Gabutero nahitabo human sa kapin duha ka semana niyang pangulipas ug pagtudlo sa usa ka Roberto Gabison alyas Insik nga matud pa maoy iyang nakit-an nga katapusang kauban ni Tocmo.

Si Gabison sab maoy gitudlo ni Gabutero nga nagsugo niya human siya mailhi nga maoy nagbaligya sa cellphone sa biktima.

Salamat sa pagpursigir sa kapolisan pagpanghipos og mga ebidensiya, nabisto ang kabakakon ni Gabutero hinungdan nga napugos siya pag-angkon sa krimin. Lig-on ang mga ebidensiya sa kapolisan batok ni Gabutero sanglit gawas sa cellphone sa biktima nga nakuha gikan niya, nakita sab sa CCTV footage ang iyang paglabay sa karton nga gisudlan sa lawas ni Tocmo.

Giangin pa niya sa krimen ang iyang minor de edad nga igsuon nga maoy iyang gipagunit sa karton luwan sa motorsiklo dihang ila kining gilabay.

Wala hinuoy plano ang kapolisan nga iapil sa kaso ang manghod sanglit miingon kini nga wala siya masayod unsay sud sa karton ug andam sad kining motistigo.

Nakuha sab sa kapolisan ang driver sa habal-habal nga maoy naghatod ni Tocmo didto sa pinuy-anan sa suspetsado.

Sigun ni Gabutero uyab silang Tocmo ug nasuko siya niini human niya masuta nga duna diay ni laing hinigugma. Matud niya nga maghatagan siya og kwarta sa biktima sa pagtuo nga siya ray uyab niini.     Kini maoy hinungdan nga iyang nahinaykan ug napatay ang biktima.

Ang kasulbaran sa kaso ni Tocmo nagpakita sa katakos sa atong kapolisan pag-imbistigar. Hinaut nga ang ubang mga kaso nga wala pa nila masulbad kahatagan na pud og hustisya ang mga biktima.