Mitago si Kong Teves

Kutob ra niadtong Marso 9, 2023 ang opisyal nga pagbiyahi ni Kongresista Arnulfo “Arnie”  Teves Jr. sa ikatulo nga distrito sa Negros Oriental didto sa gawas sa nasud. Hinungdan nga nangayo siya og pagtugot sa liderato sa Ubos Bay Balauranan nga lugwayan pa ang iyang biyahi og laing duha ka buwan apan wala siya gitugotan.

Ang kongresista mao ang gitumbok nga utok sa pagpatay ni Negros Oriental Governor Roel Degamo. Nadamay sa pagpatay sa gobernador ug namatay usab ang lain pang walo ka mga tawo sulod mismo sa compound sa panimalay sa gobernador niadtong Marso 4, adlaw nga Sabado pasado alas nueve sa buntag ug miangol usab sa lain pang 16 ka mga tawo. Apan gihimakak ni Kongresista Teves ang pasangil nga gibato batok kaniya.

Giawhag ni House Speaker Martin Romualdez s Teves sa pagpauli na sa nasud aron atubangon ug tubagon ang pasangil batok kaniya apan wala kini panumbalinga sa kongresista. Ang House Committee on Ethics mihunong na usab sa ilang imbestigasyon sa pasangil batok ni Teves tungod sa kapakyas niini sa pagtunga sa gihatag nilang tagal sa pagtubag sa pasangil. Wala gitug-an sa komitiba unsa ang ilang hukom kay ila pa kining isumitir ngadto sa tanang sakop sa Ubos Bay Balauranan.

Gusto ug mihangyo ang kongresista nga virtual lamang ang iyang pagtambong sa session ug sa pagdungog sa House Committee on Ethics sa pasangil batok kaniya apan  wala siya paminawa.

Ang House Rules sa Ubos Bay Balauranan nagtugot sa blended nga session o kombinasyon sa in person ug virtual nga pagtambong sa session.

Nganong wala man mopauli dinhi sa nasud ang kongresista? Mitago ba siya? Nganong mitago man ? Nahadlok ba siya?

Ginaingon nga ang tawo nga inosente daw sama kaisog sa lion nga moatubang sa pasangil nga gibato kaniya apan ang tawo nga sad-an mas tolin pa nga modagan sa langgam nga manatad.