Angay natong barogan

Miani og dakong suporta ang Pilipinas gikan sa ubang kanasuran, partikular na sa Estados Unidos, human niining insidente na usab didto sa South China Sea o West Philippine Sea tali sa nasud ug sa China.

Gawas sa Estados Unidos, ang Japan, Australia ug Germany mipadayag usab og dakong kabalaka sa kaagresibo sa China batok sa Pilipinas ug sa ubang gagmay’ng nasud sa nagkaseryosong territorial dispute diha sa Spratly islands.

Sa labing ulahing insidente, gigamitan og laser sa Chinese Coast Guard ang usa ka vessel sa Philippine Coast Guard, ang BRP Malapascua, nga naghatud og supply sa Filipino troops nga nakabase sa BRP Sierra Madre.

Sa maong insidente, nakaangkon gayud og temporary blindness ang pipila sa mga Filipino troops sa BRP Malapascua gumikan sa pagpunting sa Chinese Coast Guard sa military-grade laser light ngadto sa atong coast guard vessel. Kini ang hinungdan ngano nga mipasaka na usab og laing diplomatic protest ang Pilipinas batok sa China. Gani gipatawag ni Presidente Ferdinand “Bongbong” Marcos ang ambassador sa China aron pag-explain sa maong hitabo.

Ang kaagresibo sa higanteng China batok sa mga gagmay’ng claimant sa mga isla sa South China Sea o West Philippine Sea maoy rason ngano nga dili gayud nasulbad kining maong territorial dispute. Kini ilabina nga adunay dakong military presence ang China sa maong dapit.

Ang problema man gud mao nga nagpagoryogoryo ang China pagsunod sa legal nga proseso aron pagsulbad sa maong gubot. Gani giyam-iran niini ang desisyon sa international court nga mipabor sa Pilipinas sa kaso sa pag-encroach sa China sa atong teritoryo sa WPS.

Niining kaagresibo sa China sa territorial dispute sa kadagatan, daghan ang nabalaka nga motumaw gayud ang full-scale war sa dili madugay. Apan angay lamang nga barogan sa Pilipinas ang katungod niini sa pagpanag-iya sa mga isla sulod sa atong teritoryo bisan kon unsa pay mahitabo.