P50 bilyones nga gahin

Gisumiter na alang sa konsiderasyon sa Konseho sa dakbayan sa Sugbo ang P50 bilyones nga budget nga gipangayo ni Cebu City Mayor Michael Lopez Rama nga gastohon alang sa operasyon sa gobiyerno sa siyudad sa tuig 2023.

Ning maong kantidad daghang kilay ang misaka tungod kay mas dako kini kun ikumparar sa salapi nga anaa sa lokal nga kagamhanan sa dakbayan sa Sugbo nga anaa lamang sa P33 bilyones apil na niini ang luna sa South Road Properties kun ugaling mahalin.

Ang opisina sa mayor mipasabot nga ang gipangayo sa mayor nga budget mahimo pinaagi sa pagkolekta sa mas taas nga taripa sa mga real property nga ania mahimotang sa dakbayan sa Sugbo. Ilang gipasabot nga ang pagkolekta og taas nga taripa sa mga real property sama sa yuta, building, elevator ug uban pa gitugot sa balaud.

Sigun sa Local Government Code, ang usa ka local nga kagamhanan makapataas sa taripa sa mga real propery matag tulo ka tuig. Apan ang dakbayan sa Sugbo kataposan kining nakapataas sa taripa sa mga real property kaniadto pa lamang tuig 2003. Buot ipasabot, moabot na sa 19 ka tuig nga wala mopaumento sa bayranan sa real property ang dakbayan sa Sugbo.

Ang opisina sa mayor mipasabot nga sa ilang pagtandi sa taripa sa real propert sa iyang mga dakbayan sama sa Mandaue, Lapu-lapu ug Talisay, ang dakbayan sa Sugbo ang pinakaubos. Gawas sa mga silingang dakbayan, gikumparar usab sa dakbayan sa Sugbo ang iyang taripa ngadto sa dakbayan sa Quezon ug Manila. Ang resulta, pinakaubos gihapon ang dakbayan sa Sugbo.

Ang opisina sa mayor mipatawag sa mga kapitan, konsehal nga chairman sa Committee on Appropriations ug mga Barangay treasurer  ug mipasabot sa pagkamahinungdanon sa papel sa barangay sa pagkolekta sa real property tax. - Sumpayan pa.