17 milyones benepisaryo sa 4Ps wa na igkita

CEBU, Philippines — Giawhag sa Department of Social Welfare and Development (DSWD) Field Office VII ang mga inactive nga Pantawid Pamilyang Pilipino Program (4Ps) beneficiaries nga mo update sa ilang information data.

Sa bulan sa Hulyo 2022 ang programa adunay 17,639 ka inactive 4Ps households. Matud pa wala na sila sa gideklarar nila nga address ug wala na sab ni process o niduso sa ilang request for transfer of residence.

Matud pa ni DSWD-7 OIC-Regional Director Shalaine Marie Lucero ngadto sa mga 4Ps beneficiaries kung aduna pa silay 0-18 anyos nga bata, moadto gilayon sa ilang Pantawid Pamilya City ug Municipal Links aron magpa update sa ilang information data ug ma asses.

Sumala pa niya kabahin sa responsibilidad sa mga beneficiaries nga mohatag og updated information sa ilang pamilya lakip sa ilang oath of commitment atol sa ilang pag enroll sa mao nga program.

Ang Inactive 4Ps beneficiaries kinahanglan mopresentar sa birth certificates sa ilang mga anak, school enrollment certificates ug sa ilang health certificate 0-5 anyos nga mga anak.

Kadtong dili makatuman niini hangtud sa Hulyo 25, 2022 automatic matangtang sa programa.

Sa pikas bahin, 384 ka pamilyang benepisaryo sa 4Ps sa Central Visayas ang naka-gradwar ug  natangtang na sa listahan sa programa karong tuiga.

Ang 374 niini  nasuta nga miuswag na ang ilang kinabuhi  pinaagi sa tabang sa maong programa, samtang  ang 10  wala mosunod sa mga kondisyon nga gipangayo sa programa.

Ang DSWD-7 nagkanayon nga ang listahan sa mga benepisaryo sa programa kanunay nga gi-update sa ilang Beneficiary Data and Management System aron mapakita ang mga aktibong benepisyaryo, kinsa angayan sa cash grants, ubos sa monitoring ug evaluation sa ilang pagsunod sa 4Ps Act o RA 11310 nga kondisyon.

Kadtong migradwar o nawala na sa programa ug na-assess nga self-sufficient na gitangtang na sa ilang listahan   ug wala nay katungod nga makadawat og bisan unsang cash grants.

Ang Central Visayas sa pagkakaron adunay 306,281 ka 4Ps household beneficiaries.— Sanden Anadia (BANAT NEWS)