Pinasikad sa Mt. 5;20-26
Ang kasaulogan kabahin gyud sa kinabuhing tawhanon. Bisan unsa ka simple ang panghitabo sa atong kinabuhi. Apan sa matag kasaulogan anaa usahay ang babag. Usa na niini mao man ang kasingkasing nga puno sa kalagot ug kapungot.
Malisod ang pagsaulog ug pagkahimong malipayon kun anaa sa kahiladman nato ang dakong kalagot.
Sa panahon nga kita nahimong maglagot halayo kanato ang kalinaw. Sa panahon nga kita mahiubos anaa ang dakong agwat sa relasyon. Ang tanan nahimong dili makahuloganon ug pabilin kitang binilanggo sa atong inordinate nga emosyon nga makapahimo kanatong mahisalaag usahay. Ang kinabuhi malisud puy-an kun ingon ini ang atong masinati.
Kun buot natong magsaulog atong himoon ang mosunod:
1. Ang pag-angkon nga sama sa uban kita masalaypon ug dunay kahuyangan. Apan wala kini magpasabot nga kita dili makasaulog.
2. Ang bugtong paagi aron mamahimo kitang gawasnon mao man ang pagpasaylo.
3. Ang pagpasaylo mahimong
a. Anaa sa hunahuna. Nakita nato ang praktikal nga rason sa pagpasaylo bisan wala nato kini batia.
b. Anaa sa Pagbati. Gumikan sa atong dakong gugma sa maong tawo siya atong gipasaylo.
c. Espirituhanon nga bisan pa man kun grabe kaayo ang atong kasinatian sa maong tawo ato gihapon silang gidala sa atong mga pag-ampo.
d. Apan dili tanang pagpasaylo magdala og panag-uli. Ang imong kaugalingon mahinungdanon aron mamahimo kang dili malisoan sa pangisip.
Kun mahimo nato ning tanan, nan, mas dali ug makahuloganon ang pagsaulog. Pagsaulog diin anaa ang kalinaw nga dili mahimong kabayran og bisan unsang bahandi.