Pag-proxy ni Inday Sara makapaluha

Aniay buhing kamatuoran nganong sa tanang kandidatong milansar sa miaging eleksiyon, si Inday Sara Z. Duterte-Carpio maoy nakakuha sa kinadaghanang botos nga miabot og 32 milyones kapin. Kini tungod kay bisan ang giyangongo sa kinagamyan, adunay luna sa iyang dughan.

Usa ka Angel Mae Tayaba, junior high school student sa Pangasinan, naguol kay walay inahang motambong sa adlaw sa ilahang Junior High School Moving-Up ceremony, diin duna siyay medalyang dawaton.

Overseas Filipino Worker ang Mama ni Mae, kinsa napulo na ka tuig nga nagtrabaho sa laing nasod, gibali-wala ang puwerting antos sa tumang kamingaw, mahatagan lag hayag nga kaugmaon iyang anak.

Apan nakauli na niadtong 2017 iyang mama. Ug tungod sa pandemiya ug sa ka istrikto sa nasud nga giserbisyohan, dili kini makatambong sa maong halandumon kaayong adlaw alang sa kinabuhi ni Mae.

Nagkinahanglan si Mae og inahan nga mogakos ug mohawok niya nianang adlawa. Pero unsaon?

Sa miaging Abril 9, unang campaign rally sa BBM-SARA Uniteam didto sa San Carlos, Pangasinan, gipataas ang gidalang plakard ni Mae nga may nahisulat: “Wala akong Mama sa moving-up ceremony. Baka pwede ikaw na lang?”

Nakuhaan kinig hulagway sa camera man nila ni Inday ug nabasahan niya kini.

Pag-rally nila’g usab sa Dagupan City, miadto pod si Mae ug miisa-isa sa iyang plakard.

Dihang nakita kini ni Inday, gipasaka siya sa entablado, gisukitsukit ug gipangutana unsang orasa ang ilang Moving-Up Ceremony? Human niadto, wala na magdahom si Mae nga tunghaon siya ni Inday sa maong adlaw.

Kay sa iyang hunahuna, ordinariyo ra siyang tawo.

Igo na, nga nahiduol siya ni Inday ibabaw sa stage.

Apan pag-abot sa ilahang Moving-Up Ceremony Day, nakurat ang tibuok eskuylahan ug naamang kadiyot si Mae dihang ang ikaduhang kinatas-ang lider sa atong nasud, mitambong isip proxy sa inahan ni Mae.

Ug sama sa matuod niyang Mama, maoy misab-ong sa daw mihilak sa tumang kalipay nga medalya ngadto sa liog ni Mae, kinsa wala makasabot unsay iyang gibati niadtong tungora?

Nag-viral kini sa social media. Daghan ang mikomentariyo nga samtang sila nagsud-ong sa gibuhat ni Inday, wala nila kapugngi ang pagdahili sa ilang luha.

Grabe tinuoray ang mensaheng makuha. Hasta ko, nakahilak!