Dear Atty. Divine,
Maayong adlaw Atty. Naa mi problema nga among ikonsulta kay papahawaon mi sa tag iya sa yuta. Saop mi sud na sa walo ka tuig pero wala mi kasulatan. Nasuko ang tagiya kay nganong gipamutol namo ang mga kahoy nila. Pero before me nagpaputol nagsabot na mi daan sa una, ug sila pa gani ang nag ingon nga magpahimo mi og payag sa ilang yuta. Apan karon gisugdan na namo og trabaho ang ilang yuta pagkahibawo nila nga namutol mi, nasuko ang tag-iya ug matud pa nila lubi ra ipaputol walay labot ang kahoy. Ang kahoy nga gipamutol naa ra sa ilang yuta wala na mahilabti moingon pa sila nga ipa DENR mi. Sakit kaayo sa buot nga human na namo og limpyo ang yuta kay tamnanan na mao bitaw nga giputol ang kahoy unsaon pagtanom kung naay daghang kahoy? Ila mi gireklamo sa kapitan dayun ug wa sila magtan aw kun gi-unsa namo pag limpyo ang ilang yuta. Unsay angay namo nga buhaton? — Jen
* * *
Dear Jen,
I think, wa gyud mo magkasinabot sa tag-iya kun unsa nga kahoy ang mamahimo ninyong putlon. Mas maayo gyud unta ‘to nga sa wala pa mo namutol, inyong gipananghid pag-usab kay isip tag-iya duna man gyud silay katungod sa maong mga kahoy ilabi na nga dili madali ang pagpadako og kahoy. Actually, naa sab gyud tay balaod nga nagdili sa pagpamutol og kahoy ug kinahanglan nga mangayo ka og pagtugot sa DENR kun mamutol ka niini. Mas maayo nga makig-areglo nalang mo sa tag-iya sa yuta ug inyong pasabton kun nganong inyong gipamutol ang mga kahoy. Apan kun pananglit mangusog gyud sila sa pagpahawa kaninyo then pwede mo nga mopasaka og reklamo sa DAR batok sa tag-iya sa yuta kay basi sa balaod, ang saup protektado na sila ug dili basta-basta nga mapapahawa. Ang DAR na ang moresolbar kun ang inyong pagpamutol sa kahoy, igo bang kabasihan aron kamo mapapahawa isip saup. Thank you and God Bless. — Atty. Divine
* * *
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.