Kasimbayanan

Nagkaduol na gyud ang adlaw sa piniliay sa Mayo 9 diin daghang kalihokan ang gihimo usab karon sa tanang mga stakeholders nga apil sa mahinungdanong kalihokan sa nasud ang pagpili sa mga mosunod nga sulogoon sa katawhan, ang “Kasimbayanan” o Kawani, Simbahan ug Sambayanan nga magkahiusa alang sa usa ka tumong ug tinguha nga mao ang peaceful elections.

Gilangkoban kini sa Commission on Elections kauban ang Cebu City Police Office, Armed Forces, Coast Guard ug ubang mga ahensiya sa gobiyerno lakip na ang sektor sa relihiyon ang nagkasabot nga mohimo og lakang nga maseguro nga hapsay ang pagpahigayon sa 2022 elections sama sa pagpirma sa pledge of commitment.

Gipahigayon kini sa Cebu City Police Office diin gihimo ang symbolic lighting sa mga kandila nga nagsimbolo sa paglaum ug ang pagpalupad sa mga kalapati nga nagsimbolo sa kalinaw.

Maayo unta matuman ang gitinguha sa mga nagpasiugda sa kalihokan apan gikinahanglan nga adunay hugot nga pagpakig alayon sa mga tawo nga maoy anaa sa mga tagsatagsa ka mga dapit diin sila nagpuyo.

Labaw sa tanan ang kooperasyon sa mga kandidato nga mopatuman sa disiplina dili lang sa ilang mga supporters kon dili nila mismo nga dili mohimo og mga lakang nga makasupak sa balaod nga mao usay makaingon sa kasamok. Hinuon posibleng aduna usay maumol nga peace covenant sa tanang mga kandidato labi na sa local setting aron magkasinabtanay.

Pastilan basin kutob lang sa pirma o ceremonial ang gihimo apan inig sa aktwal na nga panghitabo wala gihapon silay mahimo.

Hinuon in fairness sa atong dapit wala may kagubot nga mitumaw sa nanglabay nga mga piniliay, kutob lang sa labtikay sa pulong  walay lawasay nga kombate, samot na nga walay armasay. Nagpakita lang usab kini nga dili mahigugmaon sa kagubot ang mga Sugboanon ug maayo usab modala ang mga tinugyanan sa balaod sa sitwasyon.

Aduna may dugoong panghitabo sa lalawigan sa Sugbo particular sa lungsod sa San Fernando diin usa ka kandidato sa pagka konsehal sa lungsod apil ang iyang bana ang gipusil sa lima ka mga suspek.

Apan dili pa kini maisiop nga adunay kalambigitan sa eleksiyon, posibleng personal ug negosyo ang motibo.

Matud sa pangulo sa kapolisan sa lalawigan nga layo ra kini sa tinuod nga election-related violence ang nahitabo busa dili pa sila morekomendar nga ipaubos sa hot spot o election watchlist ang lungsod.

Anaa ra gyud sa kamot natong tanan, kong gusto natong angkonon ang malamposon nga pagpahigayon sa piniliay.

Makighiusa kita sa programa sa mga otoridad kay ang mga tawo ra usab ang mabulahan kong dili kita makasugat og kagubot kay kitang tanan nagkasinabtanay.