Ang mas mahinungdanong sugo

Oktubre 31, 2021: Ikakatloag-usa nga Domingo sulod sa tuig

Mga Pagbasa: Deut. 6;2-6/Sal. 18/Heb. 7;23-28/Mk. 12;28b-24

Detalyado kaayo ang mga magtutudlo sa balaod kalabot sa pagsabot kun interpretasyon sa napulo ka mga sugo kun decalogue.

Ang maong mga sugo ila mang gihubad ngadto sa laing 613 ka mga balaod.

Apan kun ato  lang gyud sumadahon atong Makita nga mas molutaw ang balaod sa paghigugma diin ato  kining gipadayag pinaagi sa paghigugma sa Dios labaw gyud sa tanan ug sa paghigugma sa atong isig ka ingon sama sa atong kaugalingon. Wala nay laing labaw pa gyud niining duha.

Ang paghigugma tawag natong tanan kuyog niini ang tawag sa pagkabalaan.

Bisan unsa pa man ang atong kahimtang mas maayo gyud nga mahigugma. Ang gugma nagpasabot man og:

1. Pagpili. Walay si bisan kinsa nga makapugos kanimo aron siya higugmaon o ikaw higugmaon niya. Desisyon kini sa mga  linalang nga mopili aron mahigugma.

2.  Ang sukaranan sa paghigugma sa uban mao ang kaugalingon.

Dili nimo mahatag ang bisan unsa nga wala nimo mahupti. Nemo dat quod non habet matud pa.

3.  Ang tukmang panahon sa paghigugma karong adlawa kay ang ugma wala nay kaseguorohan.

4. Ang pinakamahinungdanong mahatag nimo sa mga tawo nga imong gighigugma mao man ang imong panahon.

5. Ginamit ang mga mata sa kalumo sud-onga ang imong hinigugma. Kay diha lamang sa kalumo makita mo ang bili sa usa ka tawo.

Idlas ang paghigugma karong mga panahona. Apan sa tanto nakong pamalandong mas mahinungdanon nga sa hinayhinay higugmaon nimo ang imong kaugalingon una ang uban.

Kay ning atong panahon karon daghan ang nahimong buta ug bungol sa gugmang pinasikad lamang sa gana ug dili sa desisyon nga bisan unsay mahitabo padayon gihapon sa paghigugma.