Kutob nalang ba sa pangandoy?

“How I wish I could go back to the olden times.” Mao kini ang pulong sa akong anak nga 6-anyos samtang nag estorya mi while nag-joyride kagahapong adlawa.

Ako siyang gipangutana ngano. Mitubag siya nga gusto na siyang mobalik sa iyang eskwelahan kay gimingaw na siya sa iyang mga classmates, gusto na siyang makasulod sa mall ug moadto sa playground, ug labaw sa tanan gusto niyang mogawas nga dili na mag-facemask. Gipasabot nako siya nga maabot ra na ang panahon nga matuman ang gipangandoy in God’s perfect time. Pero kada tubag nako naa siyay daghang follow up questions nga mismo ako wala na masayod sa tubag.

Bitaw no mabalik pa ba kaha ang naandan nato nga kinabuhi o kutob nalang ba sa pangandoy nga lisod kab-oton, ilabi na karon nga murag nibalik na sad kita sa uno, parehong talan-awon sa nakalabayng tuig.

Abi nako og nakaginhawa na kita gikan sa kahasol niining pandemiya dihang na flattened na ang curve sa COVID-19 sulod sa pipila ka buwan.

Apan murag tsunami nga nilurang ug nihubas apan inig balik sa tubig mas dako ang kadaut nga mamugna.

Hinaut dili kini mahitabo, unta naaksyonan kini dayon dili lang sa gobiyerno kon dili natong tanan aron dili kita maharos sa tidal wave sa COVID-19. Maayo pa man to sa una kay naa pay igo-igong pundo ang kagamhanan nga ikasuporta kong mag-lockdown. Pero karon impossible na kay nahubas na ang panudlanan. Sige nalang og ihap sa bag-ong kaso sa COVID-19 nga makapasamot sa kabalaka kong makita nato nga inanay’ng nabalik sa square one ang sitwasyon.

Anugon kong dili nato mabarugan ang atong paningkamot kaniadto nga masumpo ang virus, wala man hingpit mawagtang apan nakuhaan.

Sa hapit mag-usa ka tuig nakong kombati nakakat-on na kitang tanan sa pamaagi nga malayo sa virus, dili unta kita mokompiyansa kay ang sobrang kompiyansa maoy maghatod baya sa kaalautan. Unta dili nalang kutob sa damgo ang tanan nga makamata kita nga wala na kitay hunahunaon nga peligro. Imposible man sa pagkakaron nga makab-ot ang atong gitinguha apan inubanan sa hugot nga pagtuo sa Ginoo ug pag-amping, mahatagan og katumanan ang atong pangandoy nga mawala na ang atong gikalisangan nga virus.