Panagsa ra bitaw ni

Duna mi tigsilhig dinhi nga ginganlan og Bebe. Usa ka adlaw niana samtang naglingkod ko may gitunol siyang sobre. Ako siyang gipangutana kun unsa kadto.

Matud niya iyang tampo alang kuno sa live streaming.

Akong gipangutana kun may magamit pa ba siya, siya nagkanayon nga naa pa bisan dyotay ang mahinungdanon mao nga nakatampo siya bisan og ginagmay, panagsa ra man bitaw, matud pa niya.

Aron dili siya malain maong gidawat nako ang maong tampo ni Bebe.

Walay dato nga wala magkinahanglan ug walay kabus nga walay ikahatag. Ning panahon sa krisis tinuod matag usa nato dunay dakong panginahanglan.

Apan wala kini magpasabot nga tungod sa maong panginahanglan dili na lang pud kita mamahimong magmanggihatagon ngadto sa uban.

Mao kini ang suliran nga gihambin sa kadaghanan nato karon. Magpunay ta og pundo apan dili na hinuon kita maantigong mopaambit. Wala man kini magpasabot nga atong ihatag ang tanan ug wala nay ibilin.

Sa laktod nga pagkasulti mahinungdanon lang gyud ang pagbahin bahin kun unsay anaa.

Kita nga nia sa ubos naningkamot nga mohimo sa ingon apan unsay gibuhat sa uban nga anaa sa hataas? Sila mismo ang mahimong mopasiugda apan ginamit ang pagpasiugda alang sa ilang kinaugalingong kabulahanan.

Gisud-ong ko ang sulod sa maong sobre ug igoigo ra gyud.

Apan gumikan sa kamanggihatagon sa nipaambit niini, angayang gamiton kini alang sa kaayohan sa kadaghanan.

Kining maong kamanggihatagon makapadasig unta dili lang sa uban kondili usab kanako tungod sa mga kahadlok kun unsaon na lang.

Apan ning panahona karon, ang Dios dili man gyud magpasagad.

Padayon kitang hatagan og kahigayonan nga mabuhi dili tungod kay daghan kita og makaon ibabaw sa atong talad kan-anan.

Kondili tungod kay duna kitay kaikag nga bisan pa man kun lisud kaayo kita naghunahuna gihapon kita sa uban, dili sama sa uban nga anaa na nila halos ang tanan apan padayon gihapon silang nanguha bisan gani sa dili ilaha.  “Kaluy-i kami ug pasayloa kami Ginoo sa among mga sala!” Ginagmay man tuod apan gikan sa gugma ug puangod.