Gisuspetsahan ni Secretary Roy Cimatu, ang gitudlong mamuno sa Inter-Agency Task Force (IATF) sa Cebu ang mga gitukod nga Barangay Isolation Centers (BIC) nga posibleng responsable sab sa pagdaghan sa mga kaso. Gibase lang ni Cimatu ang iyang suspetsa sa iyang nakita tungod kay duol kining mga BICs sa mga kabalayan, gani ang uban mao ang mga pangpublikong tunghaan sa barangay.
Apan angay untang sabton nga ang gibuhat sa siyudad diskarte aron aduna dayoy kabutangan kadtong magpositibo aron mabuwag sila sa mga silingan aron dili makatakod. Kini samtang gipa- paspasan pa ni Mayor Edgardo Labella ug sa OPAV ang pagtukod sa mga isolation facilities sa dakbayan sama sa Project Noah diha sa South Road Properties, ang pagkombirtir International Convention Center Cebu (IC3) isip isolation facility, Sacred Heart Isolation Center.
Ang mga BICs makonsiderar lang nga ‘stop gap’ samtang wala pa makompleto kining maong mga pasilidad nga para gyud sa COVID-19 patients.
Total wa may gipamati nga mga sintomas kinahanglan lang suportahan ilang immune system aron makalahutay samtang gibutang sila sa BICs. Usa pa, may pagtugot ang DOH-7 ang pagbutang og BICs sa mga barangay.
Nakatabang og dako ang BICs sa pag-conserve sa resources sa mga tambalanan tungod kay kadto rang mga grabe gyud nga pasyente maoy ilang gidawat sukad nga nagsugod kining pandemiya.
Gani, daghan sa mga natakboyan nga asymptomatics nga gidala sa mga BICs ang malampuson mang nangaayo gikan sa COVID-19.
Mao kini ang nahitabo sa kapin 200 ka COVID-19 positive sa Sitio Zapatera sa Barangay Luz nga gibutang sa Bo. Luz Elementary School alang sa isolation; Mao sab kapin 600 ka mga positibo sa Alaska-Mambaling, sa Labangon ug sa uban pang mga barangay nga nangaayo na.Kun ugaling ang BIC usa sa hinungdan, gamay ra kaayo tingali sanglit gwardiyado man kini.
Apan ang dako gyud nga purohang maoy hinungdan mao ang pagkulang sa mga barangay sa pagpatuman og higpit nga protocols diha sa ilang mga konstituwente ug ang pagkompleto sa proteksyon sa mga frontliners.
Kini maoy angayang palambuon.