EDITORYAL - Kung way signal, way klase?

Mga magtutudlo sa mga hilit nga mga kalungsoran nga walay signal sa internet mao karoy nagproblema kun unsaon nila paghimo ang ilang trabaho pinaagi niining “new normal” nga pamaagi sa pagtudlo sa DepEd nunot sa COVID-19 pandemic.

Sayo ning semanahona, daghang mga nanggawas nga balita kabahin sa mga magtutudlo sa mga hilit nga mga lugar sa nasud ang nag-antos sa pagadto sa mga awaaw nga bahin sa ilang mga lungsod diin adunay signal sa internet. Ang maong mga magtutudlo kinahanglang makasalmot sa virtual conference o seminar nga gipatawag sa DepEd aron sila giyahan kabahin sa bag-ong sistema sa pagtudlo.

Kun sa pagsugod palang gani, mismo na ang mga magtutudlo naglisod sa pagsanong aning modernong sistema sa edukasyon, samot na sa ilang mga tinun-an nga mga anak og mga mag-uuma o mananagat nga mga kabus. Dili baya unta mahikawan og signal sa telekomunikasyon kining mga hilit nga mga lugar kung nabutangan sila og transmitter sa mga telecommunication companies.

Apan usa sa mga reklamo sa mga telcos mao ang mga locak officials sa mga lungsod magpaigot ug magpapresyo man pagisyu og permit. Kun unsa kaha ilang motibo o tumong, ang telcos ray nasayod kay sila may nanghangyo. Kinahanglang mointerbiner niini ang nasudnong kagamhanan aron mapadali ang pagtukod sa mga transmitters.

Hangtud nga di mabutangan og signal kining mga lugar nga dead spots, magantos niini ang mga tinun-an ug ang mga magtutudlo. Kun mao kini mahitabo, aw pirmeng way klase, way makat-onan ang mga bata.

Ang gobiyerno sa Estado Unidos pinaagi sa ilang US Agency for International Development (USAID) mogahin og P126 milyones (USD2.5 million) aron tabangan ang Pilipinas nga mapadayon ang edukasyon sa kabataang Pilipino bisan pa tungatunga aning pandemiya sa COVID-19. Ang embahada sa US didto sa Manila miingon nga nameligrong way makat-onan ang 27.7 milyones ka mga batang Filipino tungod aning pagkasuspenso sa mga klase dala aning pandemiya. Ang US andam motabang sa Pilipinas aning bahina.