Ning dakong panahon sa krisis nahimo pud nga mabinantayon kita sa atong ipanulti. Kini tungod kay daghang mga tawo ang nahimong mangita og buling sa imong baruganan ug mahimong ila kining gamiton sa pagdaut kanimo sa hilabihan.
Ning maong paagiha nahimong mas daghan ang maglagot ug masibot nga manginlabot gumikan ning maong kalaki nila nga magdili kanato sa pagpadayag sa atong gibati ug gihunahuna. Kun lahoson ka og dakop apan way tinong pagpasabot sa hinungdan kun nganong ikaw gidakop, usa man ka dakong tinonto dili ba?
Hinuon ning panahon nato karon daghan ang nahimong mabudhion mismo sa kaugalingong baruganan. Kini tungod kay daghan man nato karon ang nahimong mga walay ayo tungod ba kaha sa tinguha nga mamahimong siguro sila sa ilang kaugalingon at the expense sa kaayohan sa ubang mga tawo? O buot lang nilang magpabilin sa status quo aron sa ingon walay labad sa ulo.
Subo lang palandungon nga daghan nato ang dili mosulti tungod lang kay gusto natong mamahimong mga tawong mosunod lamang sa giisip natong amo.
Anaa man ang freedom of expression kun buot hunahunaon apan in fairness pud, daghang mga tawo ang nigamit pud niini aron himoong kahimanan sa pagdaut sa uban. Ingon ini na lang ba gyud ka luoy ang atong nasud?
Sa uban kun dunay mga suliran nga sama niini ilang palingkoron ug patimbangtimbangon sa mga hitabo mao man ang mga eksperto ug dili tong mga tawong walay kabangkaagan sa tinud-anay nga isyu. Ang resulta gubot pa sa lukot ang tanan. Mao nga ang direktiba nga ipanghatag way tataw nga sukaranan ingon man way tataw nga padulngan. Ingon ini gyud kahaguka ang tanan alang kanato.
Dunay mga pasalig ug pahiyom nga puno diay sa pagluib. Pagluib nga angayang bayran og panimawos? Apan unsaon? Ambot lang ba kaha kun makauyon ba ang Dios niini sanglit ang Dios gugma man nga way paglubad.
Ug tingali kini ang hinungdan kun nganong diha sa pag-ampo nahimong daghan gihapon ang misuway kay ang Dios ning maong pamaagi kanunay’ng hilom ug naminaw lamang sa mga sunod nga mahitabo.