Gitawag sa usa ka netizen sa social media si Gobernador Gwendolyn Garcia nga bogo, kurakot ug nagkiat lang sa gipatuman niining mga patakaran aron dili makasulod ug makontrolar ang Coronavirus Disease 2019 (COVID 19) sa lalawigan sa Sugbo.
Ang gobernador mibawos sa netizen pinaagi sa pagpakita sa dagway ug sa personal nga sirkumstansiya sa nanaway kaniya sa social media atol sa iyang inadlaw nga pakig atubang sa mga sakop sa medya.
Tungod sa gihimo sa gobernadora, ang Commission on Human Rights mitawag sa gihimo sa gobernadora nga “a cause for concern” tungod sa pagpakauwaw niini sa nanaway kaniya.
Patas ba ang Commission on Human Rights sa gihimong lakang niini batok sa gobernadora?
Kun gitan-aw sa CHR nga pagpakauwaw ang gihimo sa gobernador tungod kay iyang gipakita ang dagway ug ang personal nga sirkumstansiya sa mitawag kaniya sa social media nga bogo, kurakot ug nagkiat lang, wala ba diay makita sa nahisgotang komisyon nga usa pod ka matang sa pagpakauwaw ang gihimo sa netizen batok sa gobernadora?
Ang tawhanong katungod ug integridad iya kini sa tanan dinhi sa nasud ug wala kini itugot sa balaud nga i-monopoliya sa usa ka tawo ma-ordinaryong man siya o ma-opisyal. Buot ipasabot, kun may integridad ang netizen, anaa usab niini ang gobernadora. Kun may tawhanong katungod ang netizen, anaa usab niini ang opisyal sa gobyerno sama sa gobernadora. Wala ba makakita niini ang komisyon?
Nakasabot ko sa gibati sa gobernadora nga gitawag sa usa ka netizen nga bogo, kurakot ug nagkiat lang. Daghan karon nga netizen ang miabuso sa ilang katungod sa paggamit sa social media tungod sa pagtoo nga nga walay limitasyon ang ilang pagpadayag. Ang labing grabe mao ang pagpamasangil ug ang pagtawag nila sa tanang matang sa dautang pulong sa mga opisyal sa gobyerno.
Sakto ang gihimo sa gobernadora. Angayan lang nga pakgangon ang mga iresponsable nga netizen.