Walay kaluoy’ng employer

Usa ka kawani sa construction supply nga tindahan, kinsa usa na ka senior citizen, bag-o lang meritiro sa iyang trabaho. Dugay na kaayo siyang nagserbisyo ning maong tindahan ug nagdahom nga aduna siyay dakodakong kantidad nga madawat isip retirement pay and benefits sumala pa sa nalatid sa atong Batakang Balaod.

Abi niyag maoy mahitabo sa iyang pagretiro ang “Goodbye tension and enjoy pension.” Pastilan, unsaon man niya pag-enjoy nga imbes kuwentahan ug hatagan siya sa employer og one month basic pay per year times number of years in service, wala man gyud siyay nakuha?

Inay morelaks, kay daghan nang badlis iyang agtang, napun-an pa hinuon kinig laing kunot, ang kunot sa tumang kahisagmuyo nga iyang nadawat gikan sa walay puangod niyang employer, kinsa klaro kaayong namentaha sa iyang isig ka tawo nga tungod sa kakabos, wala intawoy igong salapi nga ikasukol og buroka didto sa hukmanan.

Dili pa gyud niya maasikaso pagtarong ang iyang SSS pension, kay matud niya may mga bulan o tuig nga wala i-remit sa employer ang otomatik gikaltas nga SSS contribution gikan sa iyang binulang suweldo. Grabeha, sa?

Hinuon, giadto na niya ang Department of Labor and Employment (DOLE) ug nagpatabang.

Gipadad-an nag summon ang concerned employer. Duha na ka beses. Ang nakaparat, kay wala gyuy employer nga mitungha aron sila magkaatubang ug kasugdag husay ang gisang-at nga reklamo.

Unsaon, matud pa niya, bisag ang summon gihatod na didto sa gireklamo, ultimo ang guwardiya mibalibad. Timaan nga dili gyud mo-acknowledge ang employer sa summon nga nag-awhag sa iyang presensiya didto sa husayanan.

Pwede ra ba diay kining diskartiha? Dili ba neglecting court’s order to appear in order to face the complaint filed by the complainant against him/her is punishable by law?

Nagsalig kaha ang employer nga daghan siya’g kuwartang ikabayad og mahalong abogado batok sa mamumuong kabus, kinsa maglisod gani’g palit og bag-ong sinina sa usa ka tuig?

Nagtuo kaha kining walay kaluoy’ng magpapatigayon nga ning panahon ni Pres. Duterte, magunitan gihapon ang balaod sa binandol niyang salapi? Hinuon, modangop ang pobreng reklamante sa Public Attorney’s Office aron magpalaban. 

Unta, makatumong siya’g buotang abogado. Ug tabangan sa Ginoo nga magmadaugon.