Manghunaw ra aron di mabasol

Taliwala sa nag-alintabo’ng balita bahin sa duha ka kumpirmadong kaso sa novel corona virus, gibasol karon ni Health Secretary Francisco Duque III ang PAL ug Cebu Pacific nga mao kuno’y hinungdan sa kalangan sa pagsubay sa mga tawo nga natandang sa virus sulod sa maong mga flight tungod sa pagmakuli sa mga airlines paghatag sa contact details sa mga pasahero.

Isyu man unta kini sa panglawas busa motuyhakaw unta ang ulo sa liderato sa DOH aron mangulo pagresolbar niining mga butanga. Apan sama sa ilang tambag nga magpunay lang og panghunaw aron di matakdan sa corona virus, nanghunaw usab ang DOH sa ilang kaakuhan aron di mabasol niining maong kapalpakan.  Gidamay pa gani ang uban.  Lihay pa more!

Gidili na paghalok

Miawhag karon ang mga kadagkoan sa Diocese sa Borongan, Eastern Samar sa mga sakop sa Katoliko’ng simbahan nga likayan lang una ang paghalok ingon man pagpahid sa ilang mga panyo ngadto sa mga rebulto ug mga imahen aron malikayan ang pagkuyanap sa novel corona virus. Buot ba ipasabot nga hasta ang mga rebulto nagdala usab ug corona virus? Wala hinuon masuta kon apil ba usab sa awhag sa diocese nga dili na usab ang katawhan pahalokon ngadto sa pari. Sakto ang gipamulong ni Jesukristo: “Pagkagamay sa inyong pagtoo”. Pag-chure mo Padz uy!

Tago mga ilaga, naay inspector

Magkamulo na karon ang mga sanitary inspectors sa dakbayan sa Sugbo human momando si Mayor Edgar Labella nga susihon ang Larsian Food Complex sa may Fuente Osmeña tungod sa gikataho nga presensya sa daghang ilaga sa maong lugar.

Alang sa mayor ang kalimpyo sa maong kan-anan maoy labing mahinungdanon tungod kay pagkaon man ang baligya sa Larsian.  Wala hinuon maapil sa kamanduan sa Mayor nga sunogon ang Larsian aron mahanaw usab ang mga ilaga, kon naa man. Maayo tingale nga magdala na lang usab ang mga sanitary inspector ug mga IRING nga maoy motabang pagpanakop sa mga ILAGA. Alegre unya ang Larsian!

Nagtuyok-tuyok nga kawsa

Matud pa ni Presidente Duterte ang korapsyon sa Bureau of Customs ug sa BIR sinsilyo ra kon itandi sa korapsyon nga gibuhat sa mas taas nga antas sa kagamhanan kinsa kakunsabo sa mga adunahan, mao nga wala moasenso ang atong nasud.

Di ba nagkanayon man kanhi si PNoy, “Kung walang kurap, walang mahirap”. Sa ato pa, kon undangon ang korapsyon,  daghan ang madato. Apan alang kang PDut, ang mga mga adunahan maoy kusog mangurap.

Sa ato pa usab, kon madato na ang katawhan, modaghan na usab ang korapsyon. Mora ug nagtrokis ug nagtujok-tujok ra man ang kawsa sa duha ka Presidente. Madahaan!