Ang Kaldero ug kita

Nahimong isyu karon sa atong nasud ang kalabot sa cauldron kun kaldero nga gamiton lang sa SEA Games. Nibalor kini og mga 50 milyones kapin kun kulang.butang nga nakahaling og labihang batikos usa na niini si Sen. Franklin Drilon. Agig bawos siya usab gibatikos sa kanhiay pud niyang proyekto nga gatusan pud ka milyones. Nagkadaiya ang mga panahom apan kun sumadahon daghan ang nangutana kun kinahanglanon ba gud nga mogasto kita og sama niini. Kinahanglanon ba gyud nga ingon ini kadako ang gastohon sa mao lang cauldron?

Ang inprastraktura matud pa maoy salamin sa atong nasud ug gani sa mga tawo nga nipatukod niini. Bisan gani diha sa panimbahan daghanan nato ang maningkamot nga kun mahimo unta aaa ang nindot nga simbahan ug kasagaran ang maong obra ato dayong ilambigit niini sa pari nga nipatukod niini. Hinuon nindot man gyud nga dunay matukod nga building labina kun kinahanglanon gyud kaayo dili ba? Apan unta ang hunahunaon lang gyud unta sa kadaghanan mao nga makaya ba kaha sa atong budget.

Sa atong kinabuhi, mahinungdanon kaayo ang praktikalidad. Praktikalidad nga dili pud mosakripisyo sa kalidad. Matud pa dunay tulo kuno ka mga prinsipyo nga angayan natong hunahunaon diha sa pagtukod og bisan unsa. Naglambigit kini sa Kalig-on, Kagamitan ug Kaambong. Ning maong tulo ka prinsipyo mahimong matukod ang usa ka mahinungdanong obra ng mahimong makahikap sa kinabuhi sa uban ug sa kadaghanan. Dili  lang kay ang maong obra bunga lang sa kapritso sa hunahuna sa tagmugna.

Sa laing bahin akong gisuhid ang mga gubaong gambalay sa parokya ni San Jose. Apan sa dihang gisuwayan kini og gun-ob daw mosiga lamang ang mga semento nga nahimong saksi sa nabag-as nga panahon. Pasabot lamang kini nga nahimong mas segurado ang pagpatrabaho kaniadto. Sa laing bahin ang mga tawo nahimong mas dedikado ug misud-ong sa trabaho ingon nga salamin sa ilang pagkatawo dili sama karon nga kun motrabaho pakapinan paman gyud og tinonto. Butang nga nakahatag kanato og diskohido. Unsaon na lang kun ingon ini na lang gyud ang latid sa matag prinsipyo.

Ang laing hinungdan kun nganong lig-on kaniadto mao nga sundon gyud ang proseso. Proseso nga dili dinalian. Proseso nga kun unsay gilatid sa plano ug sa kwentada sa materyales mao gyud ang gamiton ni bisan kinsang inhenyero ug mga panday kay bisan pa man kun mahinungdanon ang isulod sa bulsa apan dili maayong isakripisyo ang seguridad sa mga tawo. Labina gyud tingali ning mga panahona karon nga nahimong daw sa ordinaryo na lang kaayo ang mga makusog nga mga linog.

Ang praktikalidad unta magdasig kanato nga mamahimong makontento kun unsay naa kanato ug dili na lang gyud mangita kun unsay wala.dugang pa dili maayo nga atong itandi ang atong kaugalingon ni bisan kinsa ug sa bisan unsa kay ning paagiha nahimong mas masakitan lamang kita kun ugaling masinati nato ang kapakyasan ug mamahimong mas ubos na hinuon ang atong pagtan-aw sa atong kaugalingon ning kalakiha.

Mao nga tungod sa naghinobrang ambisyon daghanan nato ang nahimong nagpabilin lamang diha sa ilusyon nga mahimo nato ang tanan apan ang matuod mao nga lisud gyud diay kun hakgumon nato ang bisan unsa nga gitanyag sa atong hunahuna. Kay ning paagiha nahimong mas daw giabat kita inay mamahimong maantigong mosala kun unsay applicable o dili. Unsay angayan o dili o unsay makatarunganon o dili. Nilihok kita alang sa progress dili aron magpa impress.

Kay diha sa atong kinabuhi ang tanan natong imontar mahimong magun-ob lang sa usa ka pamilok butang nga usahay lisud kaayo dawaton.