Maoy ni Inday

Di pa lang dugay dunay batan-on nga labihang nakamaoy diha sa social media. Ang hinungdan mao nga ang iyang hinigugma kaniya mibiya ug miilis kaniya og laing binuhat. Binuhat nga mas stable pa kay kaniya.

Stable kay may trabaho na, samtang siya wala. Tingali dunay mga butang nga angayang tan-awon una mohimo og labihang pagpabuhagay sa gibating kapikal ug kasilag anha sa social media. Ang mga emojis sa naghinobrang pagbangotan mao man tawon ang nikuyanap sa iyang galamhan.

Tingali buot niyang mokuha og atensiyon sa kadaghanan nga nihimo na lamang sa maong kahimtang nga usa ka dakong kahigayonan sa pagbahakhak dili tungod kay buot nilang tamayon ang hingtungdan kondili buot nilang himoong gaangaan ang panghitabo sa ilang palibot.

Bisan pa kun unsaon apan nahitabo naman gyud ang pagbanhig sa kaugalingon mao nga angayan lamang mohilom aron sa ingon wala nay dugang pang kadaut nga mahitabo ni angayan na lang itak-om ang baba ug hiposon ang matulisokong mga tudlo sa kaligutgot. Kay kini dili makatabang hinunoa makasamot sa panghitabo ug padayong modagayday ang dugo sa kasakitan.

Ang social media gamhanang kahimanan sa pagpadayag sa atong kahimtang, gihunahuna o baruganan. Mahimong kahimanan usab sa atong mga kalipay tungod sa daghang mga panalangin nga niabot sa atong kinabuhi.