EDITORYAL - Hagit paghawan sa kadalanan

Dako pa kaayo ang trabahuonon paghawan sa mga aseras dinhi sa Dakbayan sa Sugbo apan makita na nga aduna nay kalamboan kining gilusad nga clearing operations kay mas hamugaway ug paspas na ang paglakaw sa mga tawo diha sa kadalanan.

Sa dalan Colon, kun kaniadto maghuot ang mga tawo, street vendors ug mga sakyanan karon duna nay kahapsay bisan sa oras sa tingpamauli sa mga tawo. Duna pa hinuoy mga pipila nga namaligya diha sa mga kilid-kilid apan dili na sama kaniadto nga nakadisturbo na sila sa mga lumalabay.

Apan duna pa gihapoy ubang mga vendors nga nagmagahi sa pagtuman sa mando ni Mayor Edgardo Labella nga boluntaryong mobiya sa ilang mga pwesto. Sila kadtong wala pa tingali masayod sa kamandoan o nagtuong dili seryuso ang siyudad.

Samtang gihawanan ang mga aseras, kinahanglan sab untang lihukon kaning mga dalan nga nigamay tungod sa mga estrakturang gitukod diha na mismo sa dalan.

Ang uban niini karsada gyud nga gibutangan og tindahan ug ang uban pagkakita nga wala ra badlonga ang gibuhat sa silingan, wala sab paalkanse kay nagpatukod sab sila og ilang mga tindahan o extension sa ilang mga balay bisan naabot na sila sa karsada.

Ang uban nagsugod lang sa lamesita nga display-an sa ilang paninda, dayon gibutangan og payong-payong kay lage proteksyon gikan sa init sa adlaw, ang sunod butangan na nila og bungbong ug atop hangtud kadugayan nahimo nalang kining pinuy-anan.

Kaning tanan di unta mahitabo kun wala pa magmika ang mga opisyales sa barangay.

Ang mga kapitan nahadlok man gud nga basin masuko kanila ang mga tag-iya aning mga balaya unya dili na sila botaran sunod eleksyon.

Ang resulta, ang siyudad maoy naglisod pagbawi aning mga karsada kay ang uban modangop naman og korte ug mamasangil og dili mao batok sa lokal nga mga opisyales sa siyudad.