Lanipga

Monthly Mass mao nga kuyog sa akong mga angels nga kasagaran mga young at heart among gitadlas ang tungason nga dalan padulong sa Lanipga kay lagi himoon ang binuwan nga misa didto. Sa akong pagbaktas naumog sa singot ang tibuok kong lawas ug nag abot ang akong gininhawa saka kanaog sa bukid hangtud nga niabot kami sa kapilya. Sa hinayhinay nangabot ang mga tawo ug human sa misa, dunay hamubong kukabildo dayon paniudto. Human sa paniudto nangandam na pud ako aron s kagubaan kami mopadayon didto.

Aduna koy mga nakat-onan bunga sa akong paglantaw lantaw sa mga kabukiran ug ang dalang batoon.

1. Una ang dalan padung sa paraiso dili diay gihapon sayon. Anaa ang kalisdanan ug ang malisud ug hataas nga proseso sa pagbaktas kinahanglanon sanglit ang kinaiyahan wala man mohatag og kahigayonan aron magamit ang mga de motor nga kahimanan sa panaw. Kini aron bisan pa man kun napugos ang tawo sa pagbaktas apan kinahanglang yukboan niya ang naandang kaanyag sa kalikupan nga di mahimong gun-obon lamang gumikan sa tawhanong kahakog ug kadagasangan.

2. Ang paglakaw usa man ka tambal. Sa ato pa diha sa dalan sa atong panaw sa kinabuhi makita ra gihapon nato ang sulbad sa atong mga gihambing pagbati ug ang mga tawo nga atong mahimamat ang magsilbing hulip sa kahaw-ang nga atong nasinati gumikan sa pagpabaya sa atong mga mahal sa kinabuhi.

3. Ang singot nga mitulo mao ang timaan sa atong panlimbasog aron mamahimong tibuok pag-usab ang pisa pisa nga bahin sa atong pagkatawo.

4. Ang pagbaktas nipahinumdom nato nga sa kinabuhi diay dili tanan mamahimong makab-ot lamang sa usa  ka pagpamilok ang ubang moagi gyud sa proseso nga mahimong molanat sud sa daghang mga panahon.

5. Ang panaw sa kinabuhi bisan personal nga pakigbisog ang dili mahatagan og katumanan kun sa dalan wa kay kuyog. Ang akong mga kaubanan bisan pa man sa ilang panuigon nahimong mga simbolo sa kinabuhing malambigiton. Ang ilang mga sugilanon daghan og ikatudlo alang sa matag usa kanato ning kalibutan sa mga buhi bisan unsa pa man sila kayano.

Naminhod man tuod ang akong kalutahan ug nahimong bug-at ang lawas apan nahimong gaan ang akong pamati ug nahimong kompleto ang akong adlaw kay sa Lanipga ako nakatunga ug wala himoang babag ang iyang gilay-on aron sa Pulong sa Dios ang tanan amomahon. Salamat sa Lanipga kay nakasinati ako og maanindot nga kasinatian nga maayong imantala.